შოტლანდიის ეკლესიამ ერთნაირსქესიანთა ქორწინება დაუშვა და ნება დართო სასულიერო პირებს, ერთი და იგივე სქესის ადამიანები დააქორწინონ.

აღნიშნული საკითხის კენჭისყრა შოტლანდიის ეკლესიის მმართველ ორგანოში, გენერალურ ასამბლეაში გაიმართა. გადაწყვეტილებას, რომელმაც ერთი და იმავე სქესის წყვილების ქორწინების საუკუნოვანი აკრძალვა გააუქმა, მხარი ასამბლეის 274-მა წევრმა დაუჭირა, წინააღმდეგ კი 136 წავიდა.

უახლოეს დღეებში ცვლილებებს შეიტანენ ქორწინების რიტუალის წესებში, სადაც სიტყვები "ცოლი და ქმარი" ჩანაცვლდება "მხარეებად". მოელიან, რომ ერთნაირსქესიანთა ქორწინება შოტლანდიის ეკლესიის იურისდიქციის ქვეშ ეკლესიებში წლის ბოლომდე ჩატარდება.

აღსანიშნავია, რომ სასულიერო პირებს უფლება ექნებათ, ერთნაირსქესიანთა ქორწინება ჩაატარონ მხოლოდ სურვილის შემთხვევაში და ამ რიტუალში მონაწილეობა ნებაყოფლობითი იქნება.

ეკლესიის გადაწყვეტილებას მიესალმნენ შოტლანდიის კონსერვატორების ყოფილი ლიდერი რუთ დევიდსონი და შოტლანდიის ლეიბორისტების ყოფილი ლიდერი კეზია დუგდეილი, რომლებიც ორივე ერთნაირსქესიან ურთიერთობაში არიან.

გასულ წელს მეთოდისტური ეკლესია გახდა უდიდესი რელიგიური კონფესია დიდ ბრიტანეთში, რომელმაც დაუშვა ერთსქესიანთა ქორწინება. ანგლიკანური ეკლესიისა და რომის კათოლიკური ეკლესიის მიერ ერთნაირსქესიანთა ქორწინება დაუშვებელია.