აფხაზეთში დეპუტატების არჩევის შესახებ კანონში შესწორებებმა აფხაზური ენის სავალდებულო ცოდნის შესახებ შესაძლოა, რუსული ენის დისკრიმინაცია გამოიწვიოს, - ამის შესახებ განაცხადა რუსეთის სახელმწიფო დუმაში დსთ-ს საკითხთა კომიტეტის თავმჯდომარემ ლეონიდ კალაშნიკოვმა სხდომაზე, რომელსაც ოკუპირებული აფხაზეთის ე.წ. საგარეო საქმეთა მინისტრი ინალ არძინბაც ესწრებოდა. იუწყება სააგენტო "ინტერფაქსი".

„ჩვენ შეშფოთებული ვართ გავრცელებული ინფორმაციით კანონმდებლობის შემუშავების შესახებ, რომელიც ფორმალურად მიმართულია აფხაზური ენის მხარდაჭერისკენ, სინამდვილეში კი, რუსული ენის დისკრიმინაციამდე მივყავართ“, – განაცხადა კალაშნიკოვმა.

მისი თქმით, საუბარია დეპუტატების არჩევის შესახებ კანონში ცვლილებების შეტანაზე. აღნიშნული ცვლილებებით, კანდიდატისთვის სავალდებულო იქნება აფხაზური ენის ცოდნა და გამკაცრდება თანამდებობის პირების ლინგვისტური კომპეტენციის მოთხოვნები. მისივე თქმით, მსგავსი ინიციატივები შეიცავს ეთნიკური დაპირისპირების გამწვავების საფრთხეს, რუსული ენის სტატუსის გათვალისწინებით.

ამასთან დუმის დეპუტატის თქმით, უკრაინის გამოცდილება აჩვენებს, როგორ შეიძლება დაგროვილი ურთიერთობა „აფეთქდეს სწორედ ამ სფეროში მხოლოდ ერთი ზედაპირული მიდგომით“.