სინამდვილეში მეფის კრიტიკა და ერეკლე მეორის კრიტიკა კი არ არის ირაკლი კობახიძის პრობლემა, ქართული ოცნების მეფე მთავარი პატრონი, ამ ქვეყნის არაფორმალური მმართველი რომ გააკრიტიკა ლევან ბერძენიშვილმა, ეს არის პრობლემა, - ამის შესახებ რესპუბლიკური პარტიის ლიდერმა ხათუნა სამნიძემ "აქართული ოცნების" თავმჯდომარის ირაკლი კობახიძის განცხადების საპასუხოდ თქვა.

მისივე თქმით, იმის ნაცვლად, რომ მან ქვეყნისთვის მნიშვნელოვან საკითხებზე ისაუბროს, ის მოძალადე ჯგუფებს მწვანე შუქს უნთებს, რომ განსხვავებული შეხედულებების ადამიანებს თავს დაესხან.

"გვესმის მისგან [ირაკლი კობახიძისგან] წახალისება ძალადობის, რომელსაც აქვს ადგილი ქვეყანაში და ამ წახალისებასთან ერთად მოწოდება, რომ მომავალშიც ყველა მოძალადე ვინც არ ეთანხმება, რომელიმე პოლიტიკოსს, მზად იყოს, რომ მათი თავდასხმა არ იქნება არც დასჯილი, პირიქით. თურმე ახლა მმართველი პარტიის თავმჯდომარემ უნდა ისაუბროს ეროვნულ იდენტობაზე და სინამდვილეში მეფის კრიტიკა და ერეკლე მეორის კრიტიკა კი არ არის მისთვის პრობლემა, ქართული ოცნების მეფე მთავარი პატრონი, ამ ქვეყნის არაფორმალური მმართველი რომ გააკრიტიკა ლევან ბერძენიშვილმა, ეს არის პრობლემა", - თქვა ხათუნა სამნიძემ პლენარულ სხდომაზე.

მისივე თქმით, საქართველოს იდენტობას სწორედ ირაკლი კობახიძე ებრძვის, რადგანაც არ საუბრობს რეალურ პრობლემებზე და ცდილობს, საზოგადოება ერთმანეთს დააპირისპიროს.

"არაფრის გამო. ფსევდოპატრიოტიზმის გამო. ძალადობა არის თქვენი მთავარი დნმ თქვენს პარტიაში. აი, ამის გამო. მაგრამ ამის საშუალება არ მოგცემთ საზოგადოება. გუშინ პირველად მითხრა ჩემმა შვილმა, გარეთ საღამოს მარტო ნუ გახვალო. აი, ამ სიტყვების გამო მარტო, არ გაპატიებთ არც ერთ შემთხვევაში, როდესაც მოძალადეებს მოუწოდებთ და წაახალისებთ ძალადობას", - თქვა სამნიძემ.

6 ივნისს რესპუბლიკური პარტიის ლიდერების ხათუნა სამნიძესა და დავით ბერძენიშვილს თავს დაესხნენ. პოლიციამ საქმეზე ერთი პირი დააკავა. გარდა ამისა, პოლიტიკოსები დაზარალებულებად ცნეს.

დღეს ქართული ოცნების თავმჯდომარემ, ირაკლი კობახიძემ პარლამენტის სესიაზე განაცხადა, რომ ეროვნული იდენტობის მიმართ შეტევის ახალი ტალღა მიმდინარეობს. ამასთან, მას ბერძენიშვილსა და სამნიძეზე თავდსხმის ფაქტი არ დაუგმია.