"რესპუბლიკური პარტიის" ლიდერი, დავით ბერძენიშვილი პარლამენტში მივიდა მას შემდეგ, რაც "ქართული ოცნების" თავმჯდომარემ ირაკლი კობახიძემ, პარლამენტის პლენარულ სხდომაზე, დავით და ლევან ბერძენიშვილებს ბოლშევიკები უწოდა და თქვა, რომ მათ ეზიზღებათ ქართველი ხალხი.

თავის გამოსვლაში, ირაკლი კობახიძე არ უხსენებია 6 ივნისს დავით ბერძენიშვილის მიმართ განხორციელებული თავდასხმა და არ დაუგმია ძალადობრივი ქმედება.

პარლამენტში მისულმა დავით ბერძენიშვილმა ირაკლი კობახიძეს, მის მიერ გაკეთებულ განცხადებასთან დაკავშირებით, დებატები შესთავაზა.

"ეს არის გახელისუფლებულ "ქართულ ოცნებაში" ბიძინა ივანიშვილის მიერ ვეზირებად დანიშნული ადამიანები, რომლებიც კადრულობენ უკადრებელს, როცა არაგაქვს საკუთარი პრინციპები, წონა, ტრადიცია, ბუნებრივია, მაშინ რასაც დაგავალებენ იმას იტყვი.

კომუნისტებიდან მოყოლებული ყველა ხელისუფლება ებრძოდა რესპუბლიკურ პარტიასაც და ძმებ ბერძენიშვილებსაც, რომელმა იხეირა? მაგრამ ჩვენ არ დავმარცხებულვართ რომელიმე ხელისუფლებასთან, ჩვენზე არ გაუმარჯვია არცერთ ხელისუფლებას.

"ჩვენზე არ გაუმარჯვია არცერთ ხელისუფლებას და მითუმეტეს ახლა კობახიძისნაირი მეჩაიე დაბუტატები, ერთჯერადი დეპუტატები ვერ დაგვამარცხებენ", - ამბობს დავით ბერძენიშვილი.