სამხრეთ კავკასიაში თანამშრომლობის 3+3 ფორმატის (აზერბაიჯანი, სომხეთი, საქართველო - რუსეთი, თურქეთი, ირანი) მეორე შეხვედრა მზადების პროცესშია და უახლოეს მომავალში გაიმართება, - იტყობინება სააგენტო "ტას"-ი რუსეთის საგარეო საქმეთა მინისტრის სერგეი ლავროვის განცხადებაზე დაყრდნობით.

მედიის ცნობით, ლავროვმა ამის შესახებ თურქეთში, მევლუთ ჩავუშოღლუსთან ერთობლივ პრესკონფერენციაზე განაცხადა.

"ჩვენ შევთანხმდით, როგორ გავაგრძელოთ მუშაობა სამხრეთ კავკასიაში, მოგეხსენებათ, თურქეთის ინიციატივით შეიქმნა 3+3 ფორმატი. პირველი შეხვედრა მოსკოვში გაიმართა, ქართველმა კოლეგებმა ვერ მიიღეს მონაწილეობა, თუმცა ხაზს ვუსვამთ, რომ მათ ყოველთვის მივესალმებით. უახლოეს მომავალში მზადდება მორიგი შეხვედრა, იმედი გვაქვს, რომ შევძლებთ მისი ჩატარების შესახებ გამოვაცხადოთ", - თქვა ლავროვმა.

3+3 ფორმატის, "სამხრეთ კავკასიაში ექვსი ქვეყნის პლატფორმის" შექმნის ინიციატივთ თურქეთის პრეზიდენტი რეჯებ ტაიპ ერდოღანი გასულ წელს გამოვიდა. ეს პლატფორმა გულისხმობს თანამშრომლობას, რომელიც ფოკუსირებულია უსაფრთხოების, ეკონომიკურ და სატრანსპორტო საკითხებზე.

2021 წლის 10 დეკემბერს მოსკოვში, 3+3 ფორმატის ფარგლებში, რუსეთის, თურქეთის, ირანის, სომხეთისა და აზერბაიჯანის საგარეო საქმეთა მინისტრების მოადგილეების დონეზე, პირველი შეხვედრა გაიმართა.

ამ შეხვედრას საქართველო არ ესწრებოდა, თუმცა დროშა მაინც იყო წარმოდგენილი. შეხვედრაზე ქართული დროშის წარმოდგენას საქართველოს საგარეო საქმეთა სამინისტრომ მიუღებელი უწოდა.

საქართველოს საგარეო საქმეთა სამინისტროს განცხადებით, საქართველო არ განიხილავს ოკუპანტ რუსეთის ფედერაციასთან ერთად 3+3 ფორმატში მონაწილეობას.

2022 წლის იანვარში სერგეი ლავროვმა საქართველოს 3+3-ის ფორმატში მონაწილეობისკენ მოუწოდა. ლავროვის თქმით, ამ ფორმატში მონაწილეობა "საქართველოს არ დაავალდებულებს, შეცვალოს თავისი პოლიტიკური პოზიციები".