ავსტრიის კანცლერმა, კარლ ნეჰამერმა განაცხადა, რომ  უკრაინას ევროკავშირის კანდიდატის სტატუსი იმ პირობით უნდა მიენიჭოს, თუ მიენიჭებათ სხვა განმცხადებლებს - დასავლეთ ბალკანეთის ქვეყნებსა და მოლდოვას.

ინფორმაციას უკრაინული მედია ავსტრიულ მედიაზე დაყრდნობით ავრცელებს. ნეჰამერმა ამის შესახებ ტალინში, ესტონეთის პრემიერ-მინისტრ კაია კალასთან ერთად გამართულ პრესკონფერენციაზე ილაპარაკა.

ნეჰამერმა განმარტა, რომ ეს წინადადება საფრანგეთის პრეზიდენტს, ემანუელ მაკრონს ეკუთვნის. მისი თქმით, კანდიდატის სტატუსზე დისკუსიები ფრთხილად და სამართლიანად უნდა წარიმართოს. მან მაგალითად დაასახელა თურქეთის კანდიდატის სტატუსი, რომელიც 59 წელს გაგრძელდა.​

თურქეთის პირველი განაცხადი „ევროპის ეკონომიურ თანამეგობრობაში“ (EEC), 1960-იან წლებში გაკეთდა. ხოლო ამჟამად ოფიციალურ ანკარას კანდიდატის სტატუსი 1999 წლიდან აქვს.

თურქეთის გარდა ევროკავშირის წევრობის კიდევ ოთხი კანდიდატია ჩრდილოეთ მაკედონია, რომელმაც განაცხადი 2004 წელს წარადგინა, მონტენეგრო, რომელმაც 2008 წელს წარადგინა, ალბანეთი და სერბეთი, რომლებმაც 2009 წელს წარადგინეს განაცხადები.