მოძრაობა "დროას" ლიდერი ელენე ხოშტარია აცხადებს, რომ ირაკლი ღარიბაშვილისგან და რეალურად ოლიგარქ ივანიშვილისგან მხრიდან ევროკავშირის კანდიდატის სტატუსის შესახებ გუშინ გაკეთებული განცხადება ღიად მოღალატეობრივია. მისი თქმით, ახლა საპასუხო მოქმედებების დროა.

„გუშინ ირაკლი ღარიბაშვილისგან და რეალურად ბიძინა ივანიშვილისგან ჩვენ მოვისმინეთ ძალიან ღია მოღალატეობრივი განცხადება - ჩვენი ქვეყნის ინტერესების ღალატი. ეს არ არის გადამეტებული სიტყვები, ჩვენ ვნახეთ რომ ნელ-ნელა პროცესი რომელიც მიდიოდა ევროკავშირის პერსპექტივის წინააღმდეგ, მივიდა იმ წერტილამდე რომ ღარიბაშვილი ღიად გვეუბნება რომ კანდიდატობა არაფერს ნიშნავს და პრაქტიკულად ხელს უკრავს ჩვენი ქვეყნის ყველაზე მნიშვნელოვან რამეს - ევროპულ პერსპექტივას,“ - განაცხადა ელენე ხოშტარიამ.

მისი თქმით, ოპოზიციამ პარტნიორებთან ერთად უნდა უმუშაოს ორ საკითხზე: სანქციების დაწესებასა და ქართველი ხალხის ნების გამოხატვაზე.

ხოშტარიას თქმით, სანქცირებას უნდა დაექვემდებაროს ივანიშვილი და მასთან დაკავშირებული 5 "ბიზნესოლიგარქი" - დავით ხიდაშელი, უჩა მამაცაშვილი, ირაკლი რუხაძე, ოთარ ფარცხალაძე და ვანო ჩხარტიშვილი.

"შემდეგი საყრდენი არის სასამართლო სისტემა და აქ მთავარი პრინციპი იქნება კლანის დარღვევა და პოლიტიკური დევნის ინსტრუმენტების განადგურება. აქაც ჩვენ გვექნება კონკრეტული სია და ფაქტები. შემდეგია პროკურატურა, რომელიც ინსტრუმენტია ივანიშვილის ხელში... სუს-ი, როგორც ძალადობის პოლიტიკური ინსტრუმენტი ასევე უნდა იყოს სანქცირებული... და პოლიტიკური პოლიცია - მე დიდ პატივს ვცემ კეთილსინდისიერ პოლიციელებს, ისინი უნდა გათავისუფლდნენ იმ პოლიტიკური მარწუხებისგან, რომელიც შექმნილია ამ პოლიტიკური ოლიგარქიული მმართველობით", - ამბობს ხოშტარია.

ხოშტარიას თქმით, "დროას" წევრები და ოპოზიციის სხვა წარმომადგენლები ბრიუსელსა და ვაშინგტონში გაემგზავრებიან, რათა "ქართველი ხალხის ევროპისადმი სწრფვის ნების სიმტკიცე გააცნონ" და სანქციებთან დაკავშირებით კონსულტაციებს გამართავენ.