ევროკომისია უკრაინისთვის ევროკავშირის წევრობის კანდიდატის სტატუსის მინიჭების თაობაზე პოზიტიურ დასკვნას ამზადებს და რეკომენდაციას გასცემს ამ სტატუსის მინიჭებაზე. იტყობინება Politico ვითარების მცოდნე ოფიციალურ პირებზე დაყრდნობით.

როგორც იუწყებიან, ევროკომისრებმა ამ საკითხზე დისკუსია გამართეს ევროკომისიის პრეზიდენტის ურსულა ფონ დერ ლაიენის კიევში ვიზიტის შემდეგ.

წყაროების ინფორმაციით, ევროკომისიას კარგად ესმის, რა ფასს იხდიან უკრაინელები და მიიჩნევენ, რომ საჭიროა ძლიერი სიგნალი გაგზავნა პუტინისთვის, რომ მას არ აქვს შანსი, უკრაინა თავის გავლენის სფეროში დააბრუნოს.

ოფიციალური პირებისა და დიპლომატების თქმით, სამი ქვეყანა კვლავ ეწინააღმდეგება უკრაინისთვის კანდიდატის სტატუსის მინიჭებას. ვარაუდობენ, რომ ევროპელ ლიდერთა სამიტზე, სადაც საბოლოო გადაწყვეტილება უნდა მიიღონ, ზოგიერთ ქვეყანა გამოვა წინადადებით, რომ კანდიდატის სტატუსი უკრაინას გარკვეული პირობით მიენიჭოს, ან შესთავაზონ რაიმე ალტერნატივა.

რაც შეეხება მოლდოვასა და საქართველოს. ოფიციალური პირების თქმით, ევროკომისრები ძირითადად მხარს მოლდოვას უჭერენ, სადაც ქვეყნის სათავეში პროევროპული მთავრობაა.

"მაგრამ ისინი ნაკლებად არიან დარწმუნებულები საქართველოსთან მიმართებაში, რომელიც პოლიტიკურ რყევებსა და ბოლო წლებში საგრძნობ დემოკრატულ უკუსლვას განიცდის", - წერს Politico.

რამდენიმე დღის წინ, Bloomberg-ი იუწყებოდა, უკრაინისთვის კანდიდატის სტატუსის მინიჭების მოწინააღმდეგეთა შორის არიან დანია და ნიდერლანდები.

ევროკომისია საქართველოს, უკრაინისა და მოლდოვის განაცხადებთან დაკავშირებით, რეკომენდაციების მომზადებას 17 ივნისისთვის დაასრულებს.

საბოლოო გადაწყვეტილებას ევროკავშირის ლიდერები მიიღებენ 23-24 ივნისს გამართულ სამიტზე.

საქართველომ ევროკავშირში წევრობის განაცხადი 3 მარტს წარადგინა.