რუსეთის ძალები სევეროდონეცკის დიდი ნაწილს აკონტროლებენ, გარდა სამრეწველო ზონისა. ამის შესახებ ბრიტანეთის დაზვერვის ყოველდღიურ მიმოხილვაშია ნათქვამი.

„რუსეთის ბრძოლის ტაქტიკა არტილერიის ინტენსიურ გამოყენებას ეფუძნება, რაც მთელი ქალაქის ნგრევას იწვევს. უკრაინის შეიარაღებული ძალების ნაწილები და ასეულობით მშვიდობიანი მოქალაქე ქალაქის სამრეწველო ზონაში ქიმიური ქარხნის „აზოტის“ ბუნკერებში იმყოფება“, - ნათქვამია ინფორმაციაში.

რუსეთის ძალები, სავარაუდოდ, კონცენტრირებული იქნება „აზოტის“ გარშემო, მანამდე კი უკრაინელი დამცველები ბრძოლას აგრძელებენ.

„სავარაუდოდ, რუსეთი არ ელოდა ასეთ მედგარ წინააღმდეგობას და ასეთ გაჭიანურებულ ომს შეჭრის თავდაპირველ ეტაპზე“, - აღნიშნულია მიმოხილვაში.

წინა მიმოხილვაში დაზვერვის წარმომადგენლები ვარაუდობდნენ, რომ რუსეთს არმიის დაფინანსების გაზრდის შემთხვევაშიც კი პრობლემები ექნება ტექნიკის მარაგების შევსების მიმართულებით დასავლეთის სანქციებისა და ზოგიერთ სფეროში გამოუცდელობის გამო.

ასევე მოსალოდნელია, რომ უახლოეს თვეებში მდინარეების გადალახვაში წარმატება ომის მსვლელობისას ერთ-ერთი მნიშვნელოვანი და განმსაზღვრელი ფაქტორი იქნება.