საქართველოს პრეზიდენტის სალომე ზურაბიშვილისა და კათოლიკოს-პატრიარქ ილია მეორის შეხვედრა ვერ შედგა. ამის შესახებ ინფორმაცია თავდაპირველად საპატრიარქოს საზოგადოებასთან ურთიერთობის სამსახურის უფროსის, დეკანოზ ანდრია ჯაღმაიძის მეშვეობით გავრცელდა.

დეკანოზმა ჯაღმაიძემ ტელეკომპანია "იმედთან" საუბრისას აღნიშნა, რომ პატრიარქთან შეხვედრა ნებისმიერ დროს არ არის შესაძლებელი.

"სალომე ზურაბიშვილისა და ილია მეორის შეხვედრა ვერ მოხერხდა. პატრიარქთან შეხვედრები ასე ნებისმიერ დროს ვერ ხერხდება. თხოვნა იყო, რომ დღეს შემდგარიყო ეს შეხვედრა და დღეს არ ხერხდება. მიზეზს ვერ დაგიკონკრეტებთ, უშუალოდ მე ამ პროცესში არ ვიყავი ჩართული", - განაცხადა ჯაღმაიძემ.

დეკანოზ ჯაღმაიძის განცხადებას მალევე გამოეხმაურა პრეზიდენტი, რომელმაც შეხვედრის სურვილის შესახებ ინფორმაციის გასაჯაროებისთვის დეკანოზი გააკრიტიკა.

"პრეზიდენტის თხოვნა იყო პირადი ხასიათის! პატრიარქის სურვილის გარეშე პრეზიდენტი არასდროს ასაჯაროებს შეხვედრის შესახებ ინფორმაციას! არც არასდროს მოუთხოვია კატეგორიულად კონკრეტულ დროს შეხვედრა! პრეზიდენტს პატრიარქისადმი აქვს განსაკუთრებული პატივისცემა, სიყვარული და სულიერი დამოკიდებულება! რაც ინსტიტუციურ ჩარჩოებს სცდება!

ამ მოცემულობიდან გამომდინარე არ არის მიზანშეწონილი, რომ პრესმდივანი აკეთებდეს საჯარო კომენტარებს! მიგვაჩნია, რომ საზოგადოებასთან ურთიერთობების სამსახურის ხელმძღვანელმა უნდა იცოდეს, როგორ მოიხსენიოს ქვეყნის პატრიარქი და პრეზიდენტი!" - ნათქვამია განცხადებაში, რომელიც სალომე ზურაბიშვილის ოფიციალურ ფეისბუკგვერდზე გავრცელდა.