საფრანგეთის სავაჭრო და სამრეწველო პალატის ორგანიზებით, ყაზბეგსა და გუდაურში სათხილამურო შეჯიბრი გაიმართება
საფრანგეთის სავაჭრო და სამრეწველო პალატის ორგანიზებით, 27 და 28 თებერვალს, ყაზბეგსა და გუდაურში სათხილამურო შეჯიბრი გაიმართება.
პალატის ინფორმაციით, სათხილამურო შეჯიბრი გუდაურში დაიწყება 27 თებერვალს, 12 საათზე, პირველსა და მეორე საბაგიროს შორის (სასტუმროების „მარკო პოლოსა“ და „კარპე დიემის“ მიმდებარე ტერიტორიაზე).
საღამოს, შეჯიბრის შემდეგ, მონაწილეები გადაინაცვლებენ ყაზბეგში, სასტუმრო ROOMS-ში, სადაც გაიმართება გალა-ვახშამი.
გალა-ვახშმის დროს იგეგმება გამარჯვებულთა დაჯილდეობა და პრიზების გადაცემა.
დაჯილდოების შემდეგ გაიმართება საქველმოქმედო აუქციონი, სადაც გაიყიდება სხვადასხვა მხატვრული ნამუშევრები, ცნობილი ფეხბურთელებისა და მორაგბეების მიერ ხელმოწერილი ნივთები და სხვა.
აღნიშნულ ღონისძიებაში მონაწილეობას მიიღებენ: საფრანგეთის სავაჭრო და სამრეწველო პალატის წევრები, საქართველოში არსებული სხვა ქვეყნების სავაჭრო და სამრეწველო პალატებისა და ბიზნეს ასოციაციების წარმომადგენლები, ევროპის ქვეყნებისა და ამერიკის საელჩოები, საქართველოში არსებული საერთაშორისო ინსტიტუტების ხელმძღვანელი წარმომადგენლები, როგორებიცაა მსოფლიო ბანკი, “EBRD”, გაერო.
ღონისძიებას ასევე დაესწრება მისი აღმატებულება საფრანგეთის ელჩი საქართველოში, საფრანგეთის ეკონომიკის ატაშე საქართველოში, საქართველოში არსებული ევროპული საელჩოების წარმომადგენლები, საქართველოს ეკონომიკის და მდგრადი განვითარების მინისტრის მოადგილე, საფრანგეთის სავაჭრო და სამრეწველო პალატის პრეზიდენტი, ამერიკის სავაჭრო პალატის პრეზიდენტი და ა.შ.
