ეს ბიჭი - საუბარი მაქვს საქართველოს პრემიერ მინისტრზე - შეკეთებას აღარ ექვემდებარება, - ამის შესახებ შვედეთის ყოფილმა პრემიერ-მინისტრმა და ევროპული საბჭოს საგარეო კომიტეტის თანათავმჯდომარე კარლ ბილდტმა განაცხადა.

ბილდტი ირაკლი ღარიბაშვილის ბრალდებებს გამოეხმაურა. პრემიერმა პარლამენტში სიტყვით გამოსვლისას თქვა, რომ წინა ხელისუფლების დროს, "ბილდტის ცოლის კომპანიას მილიონები აქვს წაღებული ბიუჯეტიდან".

"ეს ბიჭი - საუბარი მაქვს საქართველოს პრემიერ-მინისტრზე - შეკეთებას აღარ ექვემდებარება. პარლამენტში სიტყვით გამოსვლისას ჩემი ცოლის დადანაშაულება საქართველოს ბიუჯეტიდან მილიონების მოპარვაში, აჩვენებს, რომ რელსებიდან გადავიდა. ის ტრაგედიაა ძალიან კარგი ქვეყნისთვის", - წერს კარლ ბილდტი.

"ბიუჯეტიდან თქვენ მილიონებს უხდიდით კარლ ბილდტს მაგალითად. კარლ ბილდტის ცოლის კომპანიას აქვს მილიონები წაღებული ბიუჯეტიდან, თქვენი მმართველობის დროს, დღეს გამოდის და გვმოძღვრავს. გადაეცით ახლა ეს დღესვე. ახლავე დაიწყეთ წერა. გადაეცით. ახლა ეს ემოციები გაივლის", - უთხრა ღარიბაშვილმა ოპოზიციას პარლამენტში სიტყვით გამოსვლისას.