ხარაგაულის საკრებულოს თავმჯდომარე მანანა ბარბაქაძე ადასტურებს, რომ საკრებულოს ოფიციალური ფეისბუკგვერიდან პრეზიდენტ სალომე ზურაბიშვილის პოსტზე დაკომენტარებული შეურაცხმყოფელი ტექსტის ავტორი თავად არის. ამის შესახებ ბარბაქაძემ "ბათუმელებთან" საუბარში განაცხადა.

"ეს ჩემი პირადი მოსაზრება იყო, სიტყვის თავისუფლებაა, მე ხომ მაქვს ჩემი პირადი მოსაზრება? ტექნიკური ხარვეზი დაფიქსირდა და მაშინვე გამოსწორდა", – უთხრა მანანა ბარბაქაძემ "ბათუმელებს", თუმცა არ განუმარტავს კონკრეტულად რა ტექნიკური ხარვეზს გულისხმობდა.

"თქვენ ქართული არ გესმით ხო?" – სხვა კითხვებს მანანა ბარბაქაძემ აღარ უპასუხა და ტელეფონი გამორთო.

შეგახსენებთ, სალომე ზურაბიშვილის ოფიციალურ ფეისბუკგვერდზე გამოქვეყნებულ პოსტზე, სადაც "ფარული მოსმენების" კანონზე ვეტოს დადების შესახე იყო საუბარი, გუშინ ღამით გამოჩნდა კომენტარი, რომლის ავტორადაც მითითებული იყო ხარაგაულის საკრებულოს ოფიციალური გვერდი.

"შხამად გექცეს, რაც შენთვის ვიწვალე და ვიშრომეთ ქ.ნო სალომე. დღეს პრემიერის გამოსვლაც დაამუნათე, შენს რეზიდენციაში იმდენი ქმრის ნათესავები გყავს, იმათ მაინც დაუჯერე, ყოველ შენს გამოსვლაზე, სისულელეებს აბრეხვებ, დაოკდი რა… ოცნებას და ბიძინას დილა საღამოს სანთლები აუნთე, მანდ რომ ბრძანდები, არ გიცნობდე მაინც", - ნათქვამი იყო კომენტარში, რომელიც მოგვიანებით წაიშალა.