რომ არა ჩემი და ჩემი გუნდის პრინციპული ასე ვთქვათ დამოკიდებულება და საჯარო მიმართვა ევროპისადმი, შესაძლოა, საქართველოს დღეს არ მიეღო ეს დამსახურებული ევროპული პერსპექტივა, - ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის ადმინისტრაციაში გამართულ ბრიფინგზე განაცხადა.

"მე მინდა ჩვენ ხალხს ავუხსნა და თქვენ აგიხსნათ შემდეგი, მე გავაკეთე განცხადება, რომელიც თქვენ ახსენეთ მას შემდეგ რაც მოვისმინეთ და ვიხილეთ ჩვენ სრულიად შეურაცხმყოფელი რეზოლუცია, რომელიც მიიღო ევროპარლამენტმა, მათ შორის ჩვენი ოპოზიციის აქტიური ჩართულობით, მათი პარტნიორების, ლობისტების უშუალო მონაწილეობით და უშუალო კენჭისყრაში მონაწილეობით.

ჩემი მაშინდელი ემოციური რეაქცია იყო აბსოლუტურად გააზრებული და მე ეს შეგნებულად გავაკეთე და რომ არა ჩემი და ჩემი გუნდის პრინციპული ასე ვთქვათ დამოკიდებულება და საჯარო მიმართვა ევროპისადმი, შესაძლოა, ვახსენებ რა ჩვენს ოპონენტებს და მათ ლობისტებს, მათ პარტნიორებს, შესაძლოა საქართველოს დღეს არ მიეღო ეს დამსახურებული ევროპული პერსპექტივა, ამის რისკები დავინახეთ ჩვენ. ვინაიდან, წარმოგიდგენიათ, ყოვლად უსამართლო, შეურაცხმყოფელი რეზოლუცია იქნა მიღებული და ჩვენ ეს ღიად ვთქვით ყოველგვარი დაფარვისა და მიკიბ მოკიბვის გარეშე, ცალსახად და ერთმნიშვნელოვნად, რომ ჩვენ არ შევეგუებით უსამართლობას და შეურაცხყოფას და ყოველთვის გვექნება ძალიან მძაფრი და სამართლიანი, პროპორციული შეფასებაც, ქმედებაც და რეაქციაც," - განაცხადა ღარიბაშვილმა.