სულ მცირე 46 ადამიანის ცხედარი აღმოაჩიენს ტეხასის შტატში, სან ანტონიოს მახლობლად მიტოვებულ სატვირთო მანქანაში. გარდაცვლილები, სავარაუდოდ, მიგრანტები არიან. იუწყება BBC.

სამაშველო სამსახურის ინფორმაციით, 16 გადარჩენილი, მათ შორის ოთხი ბავშვი საავადმყოფოში გადაიყვანეს.  

სან ანტონიო ამერიკა-მექსიკის საზღვრიდან 250 კმ-ში მდებარეობს და კონტრაბანდისტებისთვის ერთ-ერთ ძირითად სატრანზიტო მარშრუტს წარმოადგენს. ჰაერის ტემპერატურა აღნიშნულ რაიონში ორშაბათს 39 გრადუსს აღემატებოდა.

სამაშველო-სახანძრო სამსახურის უფროსის ჩარლ ჰუდის თქმით, სატვირთო ავტომობილში არ იყო კონდიციონერი და წყალი.

ტელეარხ KSAT-ის ინფორმაციით, ავტომობილი სან ანტონიოს რკინიგზასთან იპოვეს. სან ანტონიოს პოლიციის უფროსის უილიამ მაკმანუსის თქმით, დაკავებულია სამი ადამიანი.

მექსიკის საგარეო საქმეთა მინისტრ მარსელო ებრარდის განცხადებით, შემთხვევის ადგილისკენ გაემართა კონსული. მისივე თქმით, უცნობია, რომელი ეროვნების წარმომადგენლები იყვნენ გარდაცვლილები.

ტეხასის გუბერნატორმა გრეგ ებოტმა მომხდარში აშშ-ის პრეზიდენტი ჯო ბაიდენი დაადანაშაულა და განაცხადა, რომ ეს მისი „საზღვრების გახსნის სასიკვდილო პოლიტიკის შედეგია“.