თურქეთის, ფინეთისა და შვედეთის საგარეო საქმეთა მინისტრებმა სამმხრივ მემორანდუმს მოაწერეს ხელი, რომლის თანახმადაც, ანკარა მოხნის სტოკჰოლმის და ჰელსინკის ალიანსში გაწევრიანებაზე ვეტოს.

მანამდე, ნატოს გენერალური მდივნის, იენს სტოლტენბერგის ფასილიტაციით, მადრიდში გაიმართა შეხვედრა თურქეთის, ფინეთისა და შვედეთის ლიდერებს შორის.

"ამ შეხვედრის შედეგად, სამი ქვეყნის საგარეო საქმეთა მინისტრებმა ხელი მოაწერეს სამმხრივ მემორანდუმს, რომელიც ადასტურებს, რომ თურქეთი ამ კვირაში მადრიდის სამიტზე მხარს დაუჭერს ფინეთისა და შვედეთის მოწვევას ალიანსის წევრებად".

"მოხარული ვარ განვაცხადო, რომ ახლა გვაქვს შეთანხმება, რომელიც გზას უხსნის ფინეთსა და შვედეთს ნატოში გაწევრიანებისკენ", - თქვა სტოლტენბერგმა.

მისი თქმით, მემორანდუმი ასევე ითვაალისწინებს თურქეთის შეშფოთებას, მათ შორის იარაღის ექსპორტისა და ტერორიზმთან ბრძოლის შესახებ.

შვედეთმა და ფინეთმა ნატოში გაწევრიანების განაცხადები ბრიუსელში 18 მაისს წარადგინეს. ნატოში გაწევრიანებისთვის მისი ყველა, 30-ვე წევრის თანხმობაა საჭირო.

თურქეთი ნატო-ს წევრი ერთადერთი ქვეყანა იყო, რომელიც დღემდე ალიანსში შვედეთისა და ფინეთის გაწევრიანების ეწინააღმდეგებოდა.

ერდოღანი სტოკჰოლმსა და ჰელსინკის ქურთისტანის მუშათა პარტიის, მემარცხენე ექსტრემისტული ჯგუფის DHKP-C-სა და აშშ-ში მცხოვრები მქადაგებლის ფეთულა გიულენის მხარდაჭერაში ადანაშაულებდა.