დიმიტრი {ხუნდაძე} ლაპარაკობს, ე.ი. ოცნება ლაპარაკობს, - გია ხუხაშვილი "ქართული ოცნებიდან წასული დეპუტატების დიმიტრი ხუნდაძის, მიხეილ ყაველაშვილისა და სოზარ სუბარის განცხადებას სოციალურ ქსელში ეხმიანება.

"შეცდომაა ამ სამეულზე აქცენტების გადატანა.

მათ გუშინ გარკვევით თქვეს, რომ “ქართული ოცნება” მთლიანად ასე ფიქრობს. უბრალოდ, ჩვენ დაგვევალა ამის გახმოვანებაო.

ასე რომ, ნუ აცდებით რეალურ სამიზნეს - დიმიტრი ლაპარაკობს, ე.ი. ოცნება ლაპარაკობს…", - წერს ხუხაშვილი.

დეპუტატები განცხადებაში აღნიშნავენ, რომ საქართელოს კანდიდატის სტატუსს 6 თვის შემდეგაც არ მისცემენ, თუ ქვეყანა ომში არ ჩერთვება.

"საქართველოს კანდიდატის სტატუსს არც 6 თვის თავზე არავინ მიანიჭებს, თუ მანამდე ომში არ ჩაერთო ან რუსეთს სანქციები არ დაუწესა, რაც ასევე ომისკენ მიმავალი პირდაპირი გზაა", - ნათქვამია წასულების განცადებაში.

მათივე თქმით, არიან ძალები, რომლებსაც საქართველოში რევოლუცია სურთ.

"არიან დიდი ძალები, რომლებსაც საქართველოში სურთ რევოლუცია, ხალხის მიერ არჩეული ხელისუფლების შეცვლა და მისი ჩანაცვლება ადამიანებით, რომლებიც უშუალოდ არიან პასუხისმგებელი 2004-12 წლებში ჩადენილ უამრავ დანაშაულზე," ამბობენ "ქართული ოცნების" ყოფილი წევრები.