ანდრი მელნიკი გერმანიაში უკრაინის ელჩის თანამდებობიდან გაათავისუფლეს. შესაბამის განკარგულებას, რომელიც 9 ივლისითაა დათარიღებული, ხელი უკრაინის პრეზიდენტმა ვოლოდიმირ ზელენსკიმ მოაწერა.

გარდა ამისა, სახელმწიფოს მეთაურმა თანამდებობიდან გაათავისუფლა უკრაინის ელჩები უნგრეთში, ინდოეთში, ნორვეგიასა და ჩეხეთში.

შეგახსენებთ, გერმანული გამოცემა Bild-ი ჯერ კიდევ 4 ივლისს იუწყებოდა, რომ კიევი ელჩის გათავისუფლებას აპირებდა. გამოცემის ცნობით, მელნიკი თავდაპირველად უკრაინის საგარეო საქმეთა სამინიტროში დაიწყებს მუშაობას, მომავალში კი შესაძლოა, მინისტრის მოადგილედ დანიშნონ.

ბოლო ხანებში, მელნიკმა არაერთი სკანდალური და საკამათო განცხადება გააკეთა. ის ხშირად აკრიტიკებდა კანცლერ ოლაფ შოლცს, მისი თქმით, უკრაინის არასაკმარისი მხარდაჭერის გამო. მელნიკმა გერმანიის კანცლერს „ღვიძლის ძეხვიც“ კი უწოდა.

ივლისის დასაწყისი, ანდრი მელნკიმა გერმანელ ჟურნალისტთან ინტერვიუში განაცხადა, რომ არ არსებობს არავითარი მტკიცებულება იმისა, რომ სტეპან ბანდერამ ასობით ათასი ებრაელი მოკლა“.

მისი თქმით, ეს არის რუსული ნარატივი, რომელიც მხარდაჭერას ჰპოვებს გერმანიაში, პოლონეთსა და ისრაელში. ამ განცხადების გამო მელნიკი უმწვავესად გააკრიტიკეს გერმანიაში, ისრაელსა და პოლონეთში. პოლონეთის საგარეო საქმეთა მინისტრმა უკრაინელი კოლეგისგან, ელჩის განცხადების გამო, ბოდიშიც კი მიიღო.

ანდრი მელნიკი 8 წელი ხელმძღვანელობდა გერმანიაში უკრაინის დიპლომატიურ მისიას.