რუსი ექსპორტიორები, ტრადიციული საექსპორტო მარშრუტების დახურვის გამო, ბულგარეთს გათხევადებულ ნავთობის გაზს(LPG) საქართველოს, ფოთის პორტის გავლით ივლისიდან მიაწვდიან. ამის შესახებ სააგენტო Reuters-ი წერს.

Reuters-ი წერს, რომ უკრაინაში ომის დაწყების შემდეგ, რუსეთმა შეწყვიტა უკრაინისთვის LPG-ის მიწოდება და რკინიგზით საწვავის ტრანზიტი უკრაინის გავლით რუმინეთში, უნგრეთსა და მოლდოვაში, რამაც ექსპორტიორები აიძულა, ეძებონ ახალი მარშრუტები.

გამოცემა, Refinitiv-ის მონაცემებზე დაყრდნობით წერს, რომ შესყიდვები მკვეთრად შეამცირა ფინეთმაც, მაშინ, როდესაც გასულ წელს რუსეთიდან LPG-ის ექსპორტის 25% უკრაინასა და ფინეთში იყო.

Refinitiv Eikon-ის მონაცემებით, ივლისში, დაახლოებით 3000 ტონა გათხევადებულ გაზს რუსეთის ქალაქ სურგუტიდან საქართველოში ჩაიტანენ და რკინიგზით გადაზიდავენ ფოთის პორტში, საიდანაც ბორნით ბულგარეთის ქალაქ ვარნაში გაგზავნიან. სურგუტიდან ამ საწვავის მიმწოდებლები არიან „გაზპრომი“ და „სურგუტნეფტეგაზი“.

როგორც Reuters-ი წერს, ბულგარეთი თვეში, დაახლოებით, 30-35 000 ტონა თხევად გაზს მოიხმარს - ყოველთვიურად, დაახლოებით, 10 000 ტონას აწარმოებს, დანარჩენს კი რუმინეთისგან და რუსეთისგან ყიდულობს.