გერმანია მთლიანად შეწყვეტს რუსული ნახშირის ყიდვას 2022 წლის 1 აგვისტოდან, ხოლო ნავთობის ყიდვას 2022 წლის 31 დეკემბრიდან. ამის შესახებ გერმანიის ფინანსთა მინისტრის მოადგილემ იორგ კუკისმა სიდნეიში გამართულ ენერგოფორუმზე განაცხადა.

რუსული ქვანახშირისა და ნავთობის ყიდვის შეწყვეტის განზრახვის თაობაზე, მანამდე გერმანიის კანცლერი ოლაფ შოლციც აცხადებდა, თუმცა ზუსტი თარიღები არ დაუსახელებია.

ამ დროისთვის, ქვეყანაში მოხმარებული ქვანახშირისა და ნავთობის 40%-ს გერმანია რუსეთიდან იღებს.

"მათ, ვინც იცის "დრუჟბას" ნავთობსადენის ისტორია, რომელიც საბჭოთა იმპერიის იარაღი იყო აღმოსავლეთ ევროპაში, ესმით, რომ ამ დამოკიდებულებისგან თავის დაღწევა არ არის ტრივიალური საკითხი, მაგრამ ამას მივაღწევთ რამდენიმე თვეში", - აღნიშნა იორგ კუკისმა.

მისივე თქმით, მთავარი გამოწვევა იმ უზარმაზარი დანაკარგების შევსება იქნება, რომელიც გაჩნდება მას შემდეგ, რაც ევროპის ქვეყნები უარს იტყვიან რუსულ გაზზე, რომლის მიწოდებაც წელიწადში 158 მილიარდ კუბურ მეტრს შეადგენს.

შეგახსენებთ, ევროკავშირმა რუსული ქვანანახშირის იმპორტის სრული აკრძალვა აპრილის დასაწყისში, სანქციების მეხუთე რაუნდის ფარგლებში გამოაცხადა. ემბარგო 10 აგვისტოდან ამოქმედდება.

მაისის ბოლოს, სანქციების მეექვსე პაკეტის ფარგლებში, ევროკავშირმა გადაწყვიტა ნაწილობრივ აეკრძალა რუსული ნავთობის მიწოდება. აკრძალვა ეხება ნავთობის საზღვაო გზით მიწოდებას. ემბარგო ძალაში მიმდინარე წლის ბოლოს შევა.