საბერძნეთის ჩრდილოეთით, ქალაქ კავალასთან ჩამოვარდა საბრძოლო მასალით დატვირთული უკრიანული თვითმფრინავი ან-12, რომელიც სერბეთიდან იორდანიაში  კომერციულ რეისს ასრულებდა.

მედიის ინფორმაციით, საბერძნეთის სამოქალაქო ავიაციამ მიიღო შეტყობინება, რომ თვითმფრინავის ერთ-ერთ ძრავს პრობლემა შეექმნა, რის გამოც საჰაერო ხომალდი სასწრაფო დაშვების ნებართვას ითხოვდა.  

საბერძნეთმა ან-12-ს სალონიკის ან კავალას აეროპორტები შესთავაზა. ეკიპაჟმა კავალა აირჩია და დაშვება დაიწყო, რის შემდეგაც მასთან კავშირი გაწყდა. თვითმფრინავი კავალას აეროპორტიდან დასავლეთით, კავალიდან 40 კმ-ში ჩავარადა. ადგილობრივებმა აფეთქებების ხმა გაიგეს. ERT-ს ცნობით, ბორტზე 8-10 ადამიანი იმყოფებოდა, რომლებსაც 12 ტონა „საშიში ტვირთი“ გადაჰქონდათ - სავარაუდოდ, ჭურვები. თვითმფრინავის ჩამოვარდნის შემდეგ ახლოს მდებარე დასახლებებში ელექტროენერგია გაითიშა.

კატასტროფის ადგილზე ხანძარი გაჩნდა.

სამართალდამცველები იმედოვნებენ, რომ „შავი ყუთის“ შესწავლის შემდეგ კატასტროფის მიზეზები დადგინდება.

ადგილობრივი ხელისუფლების წარმომადგენლებმა უახლოეს დასახლებულ პუნქტებში მცხოვრები მოქალაქეები გააფრთხილეს, არ გააღონ ფანჯრები და საცხოვრებელი ადგილები ნიღბების გარეშე არ დატოვონ, რადგან, შესაძლოა, თვითმფრინავი ჯანმრთელობისთვის საშიში ნივთიერებებით ყოფილიყო დატვირთული.

თვითმფრინავი ეკუთვნოდა კომპანია Meridian-ს, რომელიც მსოფლიო მასშტაბით ჩარტერულ რეისებს ასრულებს. ასევე, თანამშრომლობს გაეროსა და ნატოს-თან, ტვირთების გადაზიდვისა  და სამხედროების გადაყვანის ფარგლებში.