„ირაკლი ღარიბაშვილის წერილი თავისი შინაარსით კომიკურია, ვინაიდან ის ცდილობს ევროკავშირის დარწმუნებას, რომ ბიძინა ივანიშვილი არ არის არაფორმალური მმართველი და ოლიგარქი საქართველოში”, - ასე აფასებს „ევორპული საქართველოს წევრი ოთო კახიძე ირაკლი ღარიბაშვილის მიერ გავრცელებულ წერილს.

მისივე თქმით, ამ წერილშივე იმდენ ხოტბასა და ქება-დიდებას უძღვნის თავი ხელმძღვანელს, რომ ვისაც აქამდე ეჭვი ეპარებოდა იმაში, რომ ივანიშვილი მართავდა საქართველოს მთავრობასა და ყველა სახელმწიფო ინსტიტუტს, ამ წერილის შემდგომ ნამდვილად დარწმუნდება.

„მე ვფიქრობ, რომ ძალიან მძიმე ვითარებაა, როდესაც ხელისუფლება, ქვეყნის ოფიციალური პირები ასეთ უხერხულ მდგომარეობაში აყენებენ ქვეყანას და წარმოაჩენენ ნათლად, რომ არიან ერთი მდიდარი ადამიანის ნება-სურვილის შემსრულებლები.

ყველა ეს კომენტარი, რომელიც პარალელურად კეთდება დეპუტატებისა და ოფიციალური პირების მხრიდან შვეიცარიის საბანკო სისტემის, ევროკავშირის თუ ევროპარლამენტის მიმართ სიტუაციას ძალიან კომიკურს ხდის.

გამოსავალი აქედან არის ერთადერთი, საქართველოს საზოგადოებამ უნდა გააცნობიეროს თუ რა საფრთხეს წარმოადგენს ერთი პირის არაფორმალური, ოლიგარქიული მმართველობა და რა საფრთხეს უქმნის ეს ქვეყნის ევროპულ მომავალს, ჩვენი შვილების უსაფრთხო მომავალს.

გამოსავალი არის დეოლიგარქიზაცია, ამ მმართველობის შეცვლა, უფრო და უფრო მეტი ადამიანის დარწმუნება იმაში, რომ ივანიშვილის ხელისუფლება არის სასწრაფოდ შესაცვლელი იმისთვის, რომ ჩვენი ქვეყანა წავიდე წინ.“ - განაცხადა ოთო კახიძემ.