მე არ შევხვედრივარ ბატონ ივანიშვილს საკმაოდ დიდი ხანია, საქართველოში ჩემი ყოფნის ბოლო 2,5 წლის განმავლობაში, ყველა შეხვედრისას მე ყოველთვის ვარწმუნებდი მას საქართველოს მოსახლეობისადმი აშშ-ის სრულ მხარდაჭერაში, საქართველოს მთავრობასთან მუშაობის სურვილში საქართველოს ევროატლანტიკური მომავლისთვის, საქართველოს დემოკრატიული და ეკონომიკური განვითარებისთვის, არც ერთი ამ შეხვედრის დროს არ მიცდია ბატონი ივანიშვილის დაშანტაჟება, – ამის შესახებ საქართველოში აშშ-ის ელჩმა კელი დეგნანმა განაცხადა, რომელმაც უპასუხა ჟურნალისტების კითხვას, შეხვდა თუ არა ბიძინა ივანიშვილს 24 თებერვლის შემდეგ.

კელი დეგნანის თქმით, მისთვის გასაკვირია, რატომ აკეთებს დეპუტატი ამგვარ განცხადებას, რომელიც არაფერს ეფუძნება.

„როდესაც ამის შესახებ სამშაბათს მკითხეს, არ მქონდა წაკითხული კომენტარები. არ მიყვარს კომენტარის გაკეთება მაშინ, როდესაც ფაქტები არ მესმის, ზოგიერთისგან განსხვავებით, ვისაც მოსწონთ კომენტარების კეთება ინსინუაციებზე, სპეკულაციებსა და ჭორებზე დაყრდნობით, თუმცა ახლა შემიძლია, ვთქვა, რომ მე არ შევხვედრივარ ბატონ ივანიშვილს საკმაოდ დიდი ხანია. საქართველოში ჩემი ყოფნის ბოლო 2,5 წლის განმავლობაში ყველა შეხვედრისას მე ყოველთვის ვარწმუნებდი მას საქართველოს მოსახლეობისადმი აშშ-ის სრულ მხარდაჭერაში და საქართველოს მთავრობასთან მუშაობის სურვილში საქართველოს ევროატლანტიკური მომავლისთვის, საქართველოს დემოკრატიული და ეკონომიკური განვითარებისთვის. არც ერთი ამ შეხვედრის დროს არ მიცდია ბატონი ივანიშვილის დაშანტაჟება, რაც მარტიცია, მე ვარ დიპლომატი და შესაბამისად, ამას შეუარცხყოფად არ მივიღებ, თუმცა მარტივად რომ ვთქვათ, ეს არ არის სიმართლე. უნდა ვთქვა, რომ ცოტა მიკვირს, რატომ აკეთებს ეს დეპუტატი ამ განცხადებას, რომელიც არაფერს ეფუძნება, ვინაიდან მე მას არ ვიცნობ და დარწმუნებული ვარ, რომ ის არ მონაწილეობდა ბატონ ივანიშვილთან რომელიმე ჩემს შეხვედრაში. ასე რომ, მე ცოტა გაკვრივებული ვარ მისი მოტივით ამ განცხადების გაკეთებასთან დაკავშირებით“, – აღნიშნა კელი დეგნანმა.

შეგახსენებთ, პარლამენტის წევრმა მიხეილ ყაველაშვილმა 19 ივლისს განაცხადა: „იბადება კითხვა, ხომ არ ყოფილა შეხვედრა კელი დეგნანსა და ბიძინა ივანიშვილს შორის უკრაინის ომის დაწყების შემდეგ, ხომ არ მოსთხოვეს მას რამე და ხომ არ ხდება რაღაც შანტაჟი“.