ნიუ იორკში, ლონგ აილენდზე მცხოვრებ ქართველ ქალს, მარინა გაბუნია-ვერესტს მისი ოჯახის კუთვნილი პიტბულის ჯიშის ძაღლი თავს დაესხა და დაგლიჯა. იტყობინება ტელეკომპანია NBC.

70 წლის ქალიs დასახიჩრებული ცხედარი სახლის ეზოში იპოვეს. ადგილობრივი პოლიციის ცნობით, ძაღლი გარდაცვლილის გერს ეკუთვნოდა, რომელიც რამდენიმე კვირის წინ გარდაიცვალა.

პოლიციის ინფორმაციით, ქალის ცხედარი გასული კვირის ოთხშაბათს, შუადღისას, თავისი სახლის ეზოში ნახა სამსახურიდან დაბრუნებულმა ქმარმა. პიტბულიც იქ იმყოფებოდა.

კაცმა ნანახის შემდეგ პოლიცია გამოიძახა. პიტბულმა ადგილზე მისულ სამართალდამცავებზე თავდასხმაც სცადა, რის შემდეგაც ის მოკლეს.

მედიის ინფორმაციით, ადგილზე ნანახით ტრავმირებული პოლიციელი საავადმყოფოში გადაიყვანეს.

პოლიციის თანახმად, ადგილზე არსებული ვითარება "შემაძრწუნებელი" იყო.

პოლიციის ცნობით, 7 წლის პიტბული ეკუთვნოდა გარდაცვლილი ქალის, მარინა გაბუნია-ვერესტის გერს, რომელიც ორი კვირის წინ, მოტოციკლეტით ავარიაში მოჰყვა. ის და მისი ძაღლი მშობლების სახლში ცხოვრობდნენ, მისი გარდაცვალების შემდეგ კი ძაღლის მოვლა მარინა გაბუნიამ და მისმა ქმარმა განაგრძეს.

უცნობია, რატომ და როგორ დაესხა ძაღლი თავს. პოლიციის ინფორმაციით, მანამდე ამ მისამართიდან ძაღლთან დაკავშირებით პრეტენზიები ან შეტყობინებები არ შესულა.

მარინა გაბუნია მუსიკოსი და პიანისტი იყო. ის ჯულიარდის სკოლაში საქმიანობდა.