უკრაინა და საქართველო ვერ ეღირსებიან ვერც ნატო-ს და ვერც ევროკავშირის წევრობას, - ამის შესახებ რუსეთის უშიშროების საბჭოს მდივანმა, დიმიტრი მედვედევმა რუსეთის სახელმწიფო სააგენტო „ტასთან“ ინტერვიუში განაცხადა.

„ნატო-ს მისწრაფება, გაფართოვდეს რუსეთის საზღვრებთან, როგორც ავთვისებიანი სიმსივნე, უკვე გადაიქცა მსოფლიოს პრობლემად. ყველა გონიერ ადამიანს ამაზე გული ერევა. ვფიქრობ, უკრაინა და საქართველო ვერ ეღირსებიან ვერც ნატო-ს და ვერც ევროკავშირის წევრობას, სადაც შესვლა მხოლოდ ჩრდილოატალანტიკური ალიანსის ვიწრო ხვრელის გავლითაა შესაძლებელი“, – ამბობს მედვედევი.

ამასთან, რუსეთის ყოფილი პრეზიდენტი აღნიშნავს, რომ აფხაზეთი და სამხრეთ ოსეთი დამოუკიდებელი სახელმწიფოებია და საქართველოს ხელისუფლებას ეს კარგად ესმის.

„იქ მდებარეობს ჩვენი სამხედრო ბაზები. ეს კარგად ესმით საქართველოს მოქმედი ხელისუფლების წევრებს. ისინი კიდევ ერთხელ არ გამოცდიან ბედს და არ შევლენ დაპირისპირებაში ისეთ დიდ სახელმწიფოსთან, როგორიც რუსეთია“, – აცხადებს  მედვედევი.