"დროას" ლიდერი, ელენე ხოშტარია ეხმიანება რუსი ოკუპანტების მიერ გავრცელებულ ვიდეოს, სადაც ჩანს, რომ ხელში ჩაიგდეს უკრაინაში მებრძოლი ქართველი სამხედროს, მიხეილ ქამხაძის პირადი საქმე საქართველოს თავდაცვის სამინისტროს არქივიდან.

თავად ქამხაძე, რომელიც ახლა უკრაინის შეიარაღებულ ძალებში მსახურობს, ამბობს, რომ თავისი საქმე საქართველოს თავდაცვის სამინისტროდან არ გაუტანია და დოკუმენტები უწყებაში უნდა ყოფილიყო დაცული.

ელენე ხოშტარიას განცხადებით, ქართველი სამხედროის პირადი საქმის ოკუპანტების ხელში აღმოჩენა ცხადჰყოფს, რომ "ქართული ოცნება" რუსულ სპეცსამსახურებთან თანამშრომლობს.

"მინდა, გამოვეხმაურო უკიდურესად საგანგაშო ფაქტს, რომელიც გუშინ ტელეკომპანია "მთავარის" ეთერში ვიხილეთ. სიუჟეტის მიხედვით, ქართველი სამხედროს პირადი ინფორმაცია აღმოჩნდა რუსი ოკუპანტების ხელში. წლების განმავლობაში, არაერთხელ გაჩნდა საფუძვლიანი ეჭვი, რომ „ქართული ოცნების“ სპეცსამსახურები თანამშრომლობენ რუსეთის სპეცსამსახურებთან. იმ ფონზე, როდესაც სახელმწიფოს რუსეთის არცერთი აგენტი არ გამოუვლენია წლების განმავლობაში.

გვახსოვს ტრისტან წითელაშვილის საქმე, როდესაც პრაქტიკულად დადასტურდა, რომ ქართული სამხედრო ობიექტების შესახებ ინფორმაცია რუსეთს გადაეცა.
გვახსოვს გია ცერცვაძის საქმე, როდესაც ჩვენი გმირი სამხედროს შესახებ ინფორმაცია ასევე გადაეცა რუსეთს.

უკვე არაერთი ფაქტი მიანიშნებს რომ ეს თანამშრომლობა ნამდვილად არსებობს.

ჩვენ ასევე ვხედავთ სახელმწიფოს დამოკიდებულებას უკრაინაში მებრძოლი ქართველი სამხედროების მიმართ. უკრაინაში დაღუპული სამხედროების მიმართ, რომლებსაც ჩვენ ქვეყანაში ჩამოსვენებისას არა თუ სატანადო პატივს მიაგებენ, ხშირად შეურაცხმყოფელი განცხადებებიც კი ისმის მათი ბრძოლის შესახებ.

ეს დამოკიდებულება და ის, რაც ჩვენ სიუჟეტში ვნახეთ, აღარ არის მხოლოდ დამოკიდებულება. ეს უკვე ფაქტია - ჩვენ დავინახეთ კონკრეტული დოკუმენტი კონკრეტული რუსი ოკუპანტის ხელში. ოკუპანტის ხელში, რომელმაც აწამა ანწუხელიძე და რომელსაც ქართველები უკრაინის ტერიტორიაზე ებრძვიან. ოკუპანტის ხელში, რომელმაც მიიტაცა ჩვენი ტერიტორიები. ოკუპანტის ხელში, რომელიც იტაცებს საქართველოს მოქალაქეებს. ოკუპანტის ხელში, რომელმაც გამოყარა დევნილები და აწამა ქალები, ბავშვები. და ამ ოკუპანტს დღეს ჩვენს დასაცავად ებრძვის უკრაინა. უკრაინასთან ერთად კი იბრძვიან საქართველოს მოქალაქეები, რომლებსაც ჩვენ პატივს უნდა ვცემდეთ. სწორედ ამ სამხედროებს კონკრეტული საფრთხის ქვეშ აგდებს „ქართული ოცნება“.

ეს არის ღალატი და ჩვენ კარგად უნდა გვესმოდეს, რომ ჩვენ არ ვართ შიდაპოლიტიკურ ან პარტიულ დაპირისპირებაში. ჩვენი სახელმწიფო ჩვენს მტრებს გადასცემს პირად ინფორმაციას ჩვენი გმირების შესახებ.

მე არანაირი მოთხოვნა არ მაქვს თავდაცვის სამინისტროს მიმართ იმიტომ, რომ არანაირი ილუზია არა მაქვს, რომ უწყება რომელიც ინფორმაციას გასცემს, რაიმე კეთილსინდისიერ განმარტებას გააკეთებს. ილუზია არ მაქვს გამოძიების შესახებ იმიტომ, რომ ეს გამოძიებაც მიტაცებულია ხელისუფლების მიერ. მაგრამ ამასთანავე არანაირი ილუზია არ მაქვს, რომ ჩვენ, ქართული საზოგადოება, ამ ღალატის ფაქტს „ქართულ ოცნებას“ ვაპატიებთ", - აცხადებს ხოშტარია.