ევროკომისიამ დააკმაყოფილა ინიციატივა რუსეთთან გამარტივებული სავიზო რეჟიმის შესახებ შეთანხმების სრული შეჩერების თაობაზე. ამის შესახებ პრესკონფერენციაზე შინაგან საქმეთა საკითხებში ევროკომისარმა, ილვა იოჰანსონმა განაცხადა.

"რუსეთის მოქალაქეებს არ უნდა ჰქონდეთ მარტივი წვდომა ევროკავშირის ტერიტორიაზე. ტურიზმი არ არის ფუნდამენტური უფლება. დღეს ევროკომისიამ მიიღო ინიციატივა რუსეთთან გამარტივებული სავიზო რეჟიმის შესახებ შეთანხმების სრული შეჩერების თაობაზე", - განაცხადა იოჰანსონმა.

სავარაუდოდ, უახლოესი კვირის განმავლობაში ევროკავშირის საბჭო დააკმაყოფილებს ამ ინიციატივას, 12 სექტემბრიდან კი ევროკავშირსა და რუსეთს შორის ახალი სავიზო რეჟიმი ამოქმედდება. გამარტივებული სავიზო რეჟიმის გაუქმება ნიშნავს, რომ რუსეთის მოქალაქეებისთვის ვიზის აღების დროს საკონსულო მოსაკრებელი 35-დან 80 ევრომდე გაიზრდება. გარდა ამისა, გაიზრდება წარსადგენი დოკუმენტების ჩამონათვალი, ვიზების გაფორმებისა და გაცემის ვადები.

სავიზო რეჟიმის შესახებ შეთანხმების გაუქმებას ევროკომისიის პრეზიდენტი ურსულა ფონ დერ ლაიენის გამოეხმაურა.

"რუსეთთან უკვე აღარ შეიძლება საქმის ჩვეულებრივად წარმოება. გამოვდივართ წინადადებით, მთლიანად შეწყდეს ევროკავშირთან გამარტივებული სავიზო რეჟიმის მოქმედება და არ იქნეს აღიარებული უკრაინის ოკუპირებულ ტერიტორიებზე გაცემული პასპორტები. სავიზო რეჟიმის გამარტივება ნიშანია ნდობისა, რომელიც მთლიანად დაანგრია რუსეთის აგრესიულმა ომმა", - დაწერა ურსულა ფონ დერ ლაიენმა "ტვიტერში".