გაერთიანებული სამეფოს ახალმა მონარქმა, მეფე ჩარლზ მესამემ სახელმწიფოს მეთაურის რანგში პირველად მიმართა ბრიტანელ ერს.

თავისი მიმართვა ჩარლზმა დედოფლისადმი პატივის მიგებით დაიწყო. მან მადლობა გადაუხადა დედას, ელისაბედ მეორეს, "რომელმაც მთელი ცხოვრება თავისი ხალხის სამსახურს მიუძღვნა".

მისი თქმით, დედოფალი იყო შთაგონების წყარო და მაგალითი მისთვის და მთელი სამეფო ოჯახისთვის.

მისივე თქმით, დედოფლისადმი გამოხატული სიყვარული, აღტაცება და პატივისცემა მისი ხანგრძლივი მმართველობის სიმბოლო გახდა.

"ჩემი ოჯახის ყველა წევრს შეუძლია დარწმუნებით თქვას, რომ დედოფლის თვისებები აერთიანებდა სითბოს, იუმორს და ადამიანებში ყოველთვის საუკეთესოს დანახვის შეუცდომელ უნარს".

"როგოც თავად დედოფალი ასეთი ურყევი ერთგულებით, მე ასევე ვდებ პირობას, რომ იმ დარჩენილი დროის განმავლობაში, რომელიც უფალმა მიბოძა, დავიცავ საკონსტიტუციო პრინციპებს, რომლებიც ჩვენი ერის საფუძველს წარმოადგენს".

ერისადმი მიმართვაში, მეფე ჩარლზმა დაადასტურა, რომ მისი მეუღლე, კორნუოლის ჰერცოგინია კამილა დედოფალი კონსორტი გახდება.

ამავდროულად, ჩარლზ მესამის განცხადებით, ტახტის მემკვიდრე უილიამი და მისი მეუღლე ქეითი მიიღებენ კორნუოლის ჰერცოგისა და ჰერცოგინიასა და უელსის პრინცისა და პრინცესის ტიტულებს.

დიდი ბრიტანეთისა და ჩრდილოეთ ირლანდიის გაერთიანებული სამეფოს დედოფალი ელისაბედ მეორე 96 წლის ასაკში 8 სექტემბერს, შოტლანდიაში გარდაიცვალა.

დედოფლის გარდაცვალებისთანავე, ჩარლზი გახდა გაერთიანებული სამეფოს ახალი სუვერენი. ოფიციალური კორონაცია მოგვიანებით გაიმართება.