რუსეთი უარს არ ამბობს უკრაინასთან მოლაპარაკებაზე, მაგრამ კიევის მიერ მისი გაჭიანურება გაართულებს მოსკოვთან შეთანხმების მიღწევის შესაძლებლობას. ამის შესახებ ლავროვმა რუსულ ტელერახ „როსია -1-თან“ ინტერვიუში განაცხადა.

ლავროვის თქმით, მოსკოვის პოზიცია რუსეთის პრეზიდენტმა ვლადიმირ პუტინმა დუმის  ხელმძღვანელობასთან და ფრაქციების თავმჯდომარეებთან შეხვედრაზე დააფიქსირა.

„სხდომის მონაწილეებისადმი სიტყვით მიმართვისას პრეზიდენტმა უკრაინის „ისტორიაზე“ განაცხადა, რომ ჩვენ უარს არ ვამბობთ მოლაპარაკებებზე, მაგრამ ვინც უარს ამბობს, უნდა მიხვდეს, რომ რაც უფრო მეტხანს გააჭიანურებენ ამ პროცესს, მით უფრო გაუჭირდებათ ჩვენთან მოლაპარაკება“, – თქვა ლავროვმა.

როგორც ლავროვმა აღნიშნა, კიევი აცხადებს, რომ მოლაპარაკებები მხოლოდ უკრაინის გამარჯვების შემდეგ გაიმართება. ამის შემდეგ „ისინი მზად იქნებიან მოსალაპარაკებლად, თავიანთი პირობების დაწესებით. ამაში მათ აქტიურად უჭერს მხარს ლონდონი, ვაშინგტონი და ბრიუსელიც კი. თუ ეს მათი არჩევანია, მაშინ ჩვენ ვიცით, როგორ მივაღწიოთ რუსეთის პრეზიდენტის ვლადიმირ პუტინის მიერ სპეციალური სამხედრო ოპერაციის ფარგლებში დასახულ მიზნებს,“- თქვა ლავროვმა.