რუსეთის ხელისუფლებამ გაურკვეველი ვადით გადადო ე.წ. რეფერენდუმები რუსეთთან გაერთიანების შესახებ დონბასის, ზაპოროჟიეს, ხარკოვისა და ხერსონის ოლქებში.

ამის შესახებ გამოცემა „მედუზა“ კრემლთან დაახლოებულ წყაროზე დაყრდნობით იუწყება.

გამოცემის წყარო განმარტავს, რომ ამ გადაწყვეტილების ერთადერთი მიზეზი უკრაინის არმიის წარმატებული კონტრშეტევაა ხარკოვის მიმართულებით.

წყარომ აღნიშნა, რომ კრემლის პოლიტტექნოლოგები, რომლებიც ხარკოვისა და ზაპოროჟიეს ოლქებში მუშაობდნენ, რუსეთში უკვე გაიწვიეს. წყაროს თქმით, ისინი „საჩქაროდ წავიდნენ. მიიღეს სახლში დაბრუნების ბრძანება“.

ამასთან, გამოცემის ცნობით, რუსი პოლიტტექნოლოგები, რომლებიც „რეფერენდუმს“ ამზადებდნენ, ისევ ხერსონის ოლქში იმყოფებიან.

გამოცემა აღნიშნავს, რომ სექტემბრის დასაწყისში რუსეთის ფედერაციის საბჭოს ვიცე-სპიკერი ანდრეი ტურკაჩი აცხადებდა, რომ მართებული იქნებოდა  „რეფერენდუმი“ 4 ნოემბერს - „ეროვნული ერთობის“ დღეს გამართულიყო.

ამასთან, „მედუზას“ ცნობით, ომის დაწყების პირველივე დღეებში კრემლში დარწმუნებილები იყვნენ, რომ უკვე აპრილში შეძლებდნენ ახალი ტერიტორიების დაკავებას.

გამოცემის წყარო ამბობს, რომ ამჟამად კრემლში წარმოდგენა არ აქვთ როდის დაუბრუნდებიან „რეფერენდუმის“ გამართვის საკითხს, წყაროს თქმით,  - ეს დამოკიდებული იქნება იმაზე, თუ როგორ განვითარდება უკრაინელების კონტრშეტევა.