საფრანგეთისა და რუსეთის პრეზიდენტებს შორის სატელეფონო საუბარი გაიმართა, რომლის დროსაც ემანუელ მაკრონისა და ვლადიმირ პუტინის საუბრის მთავარი თემა ზაპოროჟიეს ატომურ სადგურზე არსებული ვითარება იყო. იუწყება უკრაინული მედია.

საუბრისას პუტინმა განაცხადა, რომ ატომურ ელექტროსადგურზე იერიშებს უკრაინული მხარე ახორციელებს. 

მაკრონმა თავის მხრივ ხაზი გაუსვა ზაპოროჟიეს ატომურ ელექტროსადგურზე უსაფრთხოების უზრუნველყოფის აუცილებლობას.

„მაკრონმა აღნიშნა, რომ ატომურ ელექტროსადგურზე რისკების მიზეზი რუსული ოკუპაციაა, რომელიც ელექტროსადგურის მთლიანობას უშლის ხელს. მან სთხოვა რუსეთის პრეზიდენტს, რომ ატომური ელექტროსადგურის ტერიტორიიდან რუსულმა ძალებმა მძიმე ტექნიკა გაიყვანონ და დაიცვან საერთაშორისო ატომური სააგენტოს რეკომენდაციები“, – ნათქვამია ელისეს სასახლის მიერ გავრცელებულ განცხადებაში.

ამასთან, მაკრონმა და პუტინმა შავი ზღვის პორტებიდან მარცვლეულის ექსპორტის საკითხზეც ისაუბრეს.

პუტინმა განაცხადა, რომ მარცვლეული, პირველ რიგში, განვითარებადი ქვეყნების საჭიროებისკენ უნდა იყოს მიმართული.

მაკრონმა ხაზგასმით აღნიშნა, რომ საერთაშორისო პარტნიორებს, განსაკუთრებით რუსეთს, აქვთ საერთო პასუხისმგებლობა, უზრუნველყონ, რომ რისკის ქვეშ მყოფმა ქვეყნებმა მიიღონ მათთვის საჭირო საკვები.

"მან სთხოვა პრეზიდენტ პუტინს უზრუნველყოს, რომ რუსეთის მიერ გაერო-ს კონტროლის ქვეშ რუსეთს, უკრაინასა და თურქეთს შორის მიღწეული შეთანხმება განხორციელდეს ისე, რომ ექსპორტირებული მარცვლეული მიიღოს მათ, ვისაც ეს ყველაზე მეტად სჭირდება“, - ნათქვამია ინფორმაციაში.