აზერბაიჯანისა და სომხეთის საზღვარზე ცეცხლის შეწყვეტის რეჟიმი გამოცხადდა. იტყობინება აზერბაიჯანული სააგენტო "ტრენდი" ოფიციალურ წყაროებზე დაყრდნობით.

სააგენტოს ცნობით, 13 სექტემბრის 09:00 საათიდან ამოქმედებული რეჟიმი სომხეთის არმიამ მალევე დაარღვია, თუმცა, 09:15 საათიდან კვლავ აღდგა.

ცეცხლის შეწყვეტის რეჟიმის აღდგენის თაობაზე კომენტარი არ გაუკეთებია სომხურ მხარეს.

წუხელ, გვიან ღამით, სომხეთის თავდაცვის სამინისტრო იუწყებოდა, რომ 13 სექტემბერს, ღამის 00:05 საათზე აზერბაიჯანის შეიარაღებული ძალების დანაყოფებმა ინტენსიური ცეცხლი გახსნეს სომხური პოზიციების მიმართულებით.

უწყების ცნობით, აზერბაიჯანი ვარდენისის, სოტკის, არდანიშის, იშხანასარის, გორისისა და კაპანის მიმართულებით მიზანმიმართულად იყენებს არტილერიას, ნაღმტყორცნებს, დრონებსა და მსხვილი კალიბრის იარაღს, არამხოლოდ სამხედრო, არამედ სამოქალაქო ინფრასტრუქტურის წინააღმდეგ.

თავის მხრივ, აზერბაიჯანის თავდაცვის სამინისტრო აცხადებდა, რომ სომხეთის შეიარაღებული ძალების დივერსიული ჯგუფები ღამით აზერბაიჯანის არმიის პოზიციებსა და მომარაგების გზებს შორის ტერიტორიების დანაღმვას ახორციელებდნენ. აზერბაიჯანის ცნობით, მსხვერპლია ორივე მხარეს.

ამავდროულად, აზერბაიჯანმა კატეგორიულად უარყო სომხეთის ტერიტორიაზე შეჭრის შესახებ სომხურ მედიაში გავრცელებულ ინფორმაციას და მას აბსურდული უწოდეა. უწყება სომხურ მხარეს ლაშინის, დაშქესანისა და ქელბაჯარის რაიონებში პროვოკაციაში ადანაშაულებს და პაუხისმგებლობას სომხეთს აკისრებს.