უკრაინის პრეზიდენტის, ვოლოდიმირ ზელენსკის ინფორმაციით, რუსეთის ტყვეობიდან გათავისუფლებული „აზოვის” პოლკის მეთაურები ომის დასრულებამდე თურქეთში დარჩებიან.

ზელენსკი ტელეხიდის მეშვეობით ესაუბრა ტყვეობიდან გათავისუფლებულ უკრაინელ სამხედრო მეთაურებს.

როგორც პრეზიდენტმა აღნიშნა, ხუთი გათავისუფლებული სამხედრო მეთაური, მათ შორის „აზოვის“ პოლკის მეთაური დენის პროკოპენკო და მისი მოადგილე სვიატოსლავ პალამარი, ომის დასრულებამდე თურქეთში დარჩებიან. ზელენსკის თქმით, ასეთი იყო ტყვეთა გაცვლის პირობები.

გათავისუფლებულებს შორის არის უკრაინის მხარეს მებრძოლი უცხო ქვეყნების 10 მოქალაქეც.

გავრცელებული ცნობით, სანაცვლოდ რუსეთს გადასცეს 55 ტყვე და პუტინის ნათლიმამა, ვიქტორ მედვედჩუკი.

ასევე, "უკრაინსკა პრავდას" წყაროების თანახმად, ტყვეების გაცვლა მხოლოდ კვირას, 18 სექტემბერს შეთნხმდა.

215 უკრაინელი დამცველი 21 სექტემბერს გაათავისუფლეს.

ცნობილია, რომ გათავისუფლებულ უკრაინელ დამცველებს შორის არიან - უკრაინელი საზღვაო ქვეითების მეთაური სერჰი ვოლინსკი (ვოლინა), მარიუპოლის საპატრულო პოლიციის უფროსი მიხაილო ვერშინინი, მედიკოსი კატერინა პოლიშუკი ("პტაშკა"), 36-ე ბრიგადის უფროსი სერჟანტი მიხაილო დიანოვი, ორსული სამხედრო მედიკოსი მარიანა მამონტოვა და დმიტრო კაზაცკი "აზოვიდან".