ჩვენი ქვეყანა ისეთი მაგარია, ისეთი ლამაზია, რომ რიგები დიდი ხანია ჩვენი ჩრდილოეთ მეზობლიდან დგას, - ამის შესახებ "ქართული ოცნების" დეპუტატმა ირაკლი ზარქუამ საქართველოში შემოსული რუსეთის მოქალაქეების გაზრდილ ნაკადზე საუბრისას განაცხადა.

"ჩვენი ქვეყანა ისეთი მაგარია, ისეთი ლამაზია, რომ რიგები დიდი ხანია ჩვენი ჩრდილოეთ მეზობლიდან დგას იქ და კანონის შესაბამისად ჩვენი ძალოვანი სამსახურები ფილტრავენ. ის, ვინც მიუღებელია ჩვენი ქვეყნის ინტერესისთვის, უკან მიაბრუნებენ, როგორც აქამდე.

რაც შეეხება მცდელობას, რომ თითქოს მობილიზაცია გამოცხადდა, რომ ბოლო დღეებს ითვლის სავარაუდოდ, პუტინის რეჟიმი, ასე არ არის, მეგობრებო. თუ არ ვცდები, თვითონ აქვთ იქ ჩაკეტილი...

იმ ტურისტებს, რომლებსაც უნდათ ჩვენს ქვეყანაში ფული დახარჯონ, დაისვენონ, მივიღებთ ისევე როგორც ნებისმიერი ქვეყნიდან", - თქვა ზარქუამ.

რუსეთში სამხედრო მობილიზაციის გამოცხადების შემდეგ საქართველოს საზღვრებს რუსეთის მოქალაქეების დიდი რაოდენობა მოაწყდა.

როგორც ცნობილია, რუსეთის პრეზიდენტმა, ვლადიმირ პუტინმა ქვეყანაში ნაწილობრივი მობილიზაცია გამოაცხადა. ამის შესახებ ვლადიმერ პუტინმა სპეციალურ მიმართვაში განაცხადა.

შესაბამის განკარგულებას პუტინმა ხელი უკვე მოაწერა.

პუტინმა სპეციალურ ვიდეომიმართვაში აღნიშნა, რომ რუსეთის თავდაცვის სამინისტროს ინიციატივის შესაბამისად, რუსეთის ტერიტორიაზე ნაწილობრივი მობილიზაცია 21 სექტემბრიდან დაიწყება.

მისი თქმით, რუსეთის ფედერაციაში ნაწილობრივი მობილიზაციის ფარგლებში გაწვევას მხოლოდ რეზერვი და სამხედრო გამოცდილების მქონე მოქალაქეები დაექვემდებარებიან. ნაწილებში გაგზავნამდე, სამხედრო სამსახურში გამოძახებულები, სპეციალური სამხედრო ოპერაციის გამოცდილების გათვალისწინებით, გაივლიან დამატებით სამხედრო მომზადებას.