აშშ-მა ირანის მორალის პოლიციასა და უსაფრთხოების სამსახურების რამდენიმე მაღალჩინოსანს სანქციები დაუწესა ირანელი ქალების წინააღმდეგ ძალადობისა და მშვიდობიანი დემონსტრანტების უფლებების დარღვევის გამო. შესაბამის ინფორმაციას აშშ-ის სახაზინო სამსახური ავრცელებს.

სანქციები შეეხო ირანის უსაფრთხოების ორგანიზაციების შვიდ მაღალ ლიდერს: მორალის პოლიციას, დაზვერვისა და უსაფრთხოების სამინისტროს (MOIS), არმიის სახმელეთო ძალებს, ბასიჯის წინააღმდეგობის ძალებს და სამართალდამცავ ძალებს.

„ეს ოფიციალური პირები ზედამხედველობენ ორგანიზაციებს, რომლებიც რეგულარულად იყენებენ ძალადობას მშვიდობიანი მომიტინგეების და ირანის სამოქალაქო საზოგადოების წევრების, პოლიტიკური დისიდენტების, ქალთა უფლებების აქტივისტების და ირანული ბაჰაის თემის წევრების ჩასახშობად“, - ნათქვამია აშშ-ის სახაზინო სამსახურის მიერ გავრცელებულ ინფორმაციაში.

„მოვუწოდებთ ირანის მთავრობას, შეწყვიტოს ძალადობა ქალთა მიმართ და ძალადობრივი დარბევა გამოხატვისა და შეკრების თავისუფლებაზე. დღევანდელი ქმედება ირანის მორალის პოლიციისა და ირანის უშიშროების მაღალჩინოსნების სანქცირებისთვის, რომლებიც პასუხისმგებელნი არიან ამ ჩაგვრაში, ცხადყოფს ბაიდენის - ჰარისის ადმინისტრაციის აშკარა ვალდებულებას, მხარი დაუჭიროს ადამიანის უფლებებს და ქალთა უფლებებს ირანსა და მთელ მსოფლიოში“, - წერია აშშ-ის სახაზინო სამსახურის მიერ გავრცელებულ ინფორმაციაში.

უწყების განცხადებით, ირანის მორალის პოლიცია პასუხისმგებელია 22 წლის მაჰსა ამინის გარდაცვალებაზე. ახალგაზრდა ქალი გასულ კვირას ჰიჯაბის ტარების წესის დარღვევისთვის დააკავეს. ის გასულ პარასკევს საავადმყოფოში გარდაიცვალა. თვითმხილველები აცხადებენ, რომ ქალი ნაცემი იყო. ამინის მკვლელობას ირანსა და მსოფლიოს სხვა ქვეყნებში საპროტესტო გამოსვლები მოჰყვა.