სირიის ქალაქ ტარტუსის სანაპიროსთან გემის ჩაძირვის შედეგად 60-ზე მეტი ადამიანი დაიღუპა, კიდევ 70 კი უგზოუკვლოდ დაკარგულად არის მიჩნეული. ამის შესახებ ინფორმაციას სააგენტო dpa ავრცელებს.

სირიული მედიის ცნობით, გემი 20 სექტემბერს ლიბანიდან გავიდა. მის ბორტზე სირიის, ლიბანისა და პალესტინის მოქალაქეები იმყოფებოდნენ, ასევე პირები, რომელთა მოქალაქეობაც დაუდგენელია. ერთ-ერთი გადარჩენილის თქმით, მგზავრების რაოდენობა დაახლოებით 150-ს შეადგენდა.

 „მათ სურდათ ევროპამდე მიღწევა, ლიბანის დატოვება, რადგან ცხოვრების პირობები გაუსაძლისია“, - უთხრა საგენტო dpa-ს ერთ-ერთი გადარჩენილი მგზავრის ნათესავმა. ბოლო ინფორმაციით, 21 ადამიანის გადარჩენა მოხერხდა. სამაშველო ოპერაცია გრძელდება.

ლიბანიდან ლტოლვილები ქვეყანში უპრეცენდენტო ფინანსური კრიზისის გამო, რეგულარულად ცდილობენ გაქცევას და კვიპროსამდე და ევროკავშირის სხვა ქვეყნებამდე ნავებით მიღწევას. ლიბანიდან არალეგალურად გამგზავრების მსურველთა უმეტესობა სირიელი ლტოლვილები არიან, რომლებმაც თავიანთი ქვეყანა ომის გამო დატოვეს.