უკრაინის თავდაცვის მინისტრის მოადგილის ანა მალიარის განცხადებით, უკრაინის შეიარაღებულმა ძალებმა რუს ოკუპანტებთან ბრძოლაში 9 ათასზე მეტი ადამიანი დაკარგა. უწყება ჯერჯერობით ვერ ასახელებს დაღუპულთაზუსტ რაოდენობას, რადგან არ შეუძლია დაადგინოს დაღუპულების რიცხვი ზოგიერთ რეგიონში, კერძოდ, მარიუპოლში.   

ამასთან, მალიარმა განაცხადა, რომ უკრაინის მხარის დანაკარგი, რუსეთის დანაკარგზე მნიშვნელოვნად ნაკლებია.

 „მადლობა ღმერთს, რომ ეს არ არის ასობით ათასი. რამდენიმე კვირის წინ დასახელდა დაახლოებით 9 ათასი. რა თქმა უნდა, ჩვენ გვაქვს მარიუპოლი, სადაც ბოლომდე არ ვიცით დაღუპულთა რაოდენობა. ეს არის ათასობით, მაგრამ ეს ნამდვილად არ არის ასობით ათასი“, - თქვა მალიარმა.

ამასთან, მან აღნიშნა, რომ საუბარია სამხედრო მოსამსახურეებზე, რადგან დაღუპული მშვიდობიანი მოქალაქეების რაოდენობის დადგენით სხვა უწყებაა დაკავებული.

რამდენიმე დღის წინ რუსეთის თავდაცვის მინისტრმა სერგეი შოიგუმ განაცხადა, რომ საომარი მოქმედებების დროს 61 ათასი უკრაინელი სამხედრო დაიღუპა, 49 ათასი კი დაიჭრა. თუმცა, ექსპერტები ეჭვობენ, რომ ეს მაჩვენებლები რეალობას შეესაბამება.

შოიგუმ ასევე განაცხადა, რომ უკრაინაში 5 937 რუსი ჯარისკაცი დაიღუპა, მაშინ როდესაც უკრაინული მხარე 56 ათასზე მეტი დაღუპული რუსი სამხედროს შესახებ იუწყება.

ცენტრალური დაზვერვის სააგენტო ჯერ კიდევ ივლისში აცხადებდა, რომ უკრაინში 15 ათასზე მეტი რუსი ჯარისკაცი დაიღუპა. ივნისში კი ბრიტანეთის დაზვერვამ გაავრცელა ინფორმაცია 20 ათასი დაღუპული რუსი სამხედროს შესახებ.