გაასაჯაროონ კადრები. დადასტურდება, ვინ ცრუობს, ვინ არის მართალი, ვინ არის პროვოკატორი და ვინ არის მოძალადე, - ამის შესახებ მოძრაობა „საქართველოსთვის“ აქტივისტმა გიორგი მუმლაძემ განაცხადა.

მისი თქმით, „ნაციონალური მოძრაობის“ მიერ გავრცელებულ დღევანდელ განცხადებაში ბევრი სიცრუეა.

"მე ვამბობ პირდაპირ, რომ არაფერი მაქვს დასამალი და გაასაჯაროონ კადრები, რომლებიც, ბუნებრივია, გადაღებული იქნება, რადგან ვიდეოკამერები არის ოფისში. დადასტურდება, ვინ ცრუობს, ვინ არის მართალი, ვინ არის პროვოკატორი და ვინ არის მოძალადე. გაასაჯაროონ ვიდეოკადრები, არ არის პრობლემა.

რაც შეეხება შემდეგ საკითხს, რომ მე ნამდვილად, როდესაც ის საზოგადოებრივი მაუწყებლის ეთერში იყო, ჩემს მეგობრებთან ერთად მივედი. მინდოდა, მისთვის პირისპირ დამესვა შეკითხვები, რატომ მიუთითებდა ის თავის ქვეშევრდომებს, რომ ჩვენზე ეძალადათ უფრო მეტად, ვიდრე ძალადობდნენ. რადგან წლების განმავლობაში, ნიკა მელიას მხარდამხარ ვიბრძოდით, მის გამო მზად ვიყავი, რომ სპეცრაზმს დავხვედროდი „ნაცმოძრაობის“ ოფისში და ფიზიკურად დამეცვა. მისი თხოვნით და ინიციატივით მე წავედი ზუგდიდში ჩემს მეგობრებთან ერთად, რომ დამეცვა ანზორ მელიას ხმები. იქ ჯერ მცემეს და შემდეგ 10 დღე ფოთი იზოლატორში გავატარე. მისი ინიციატივით მე ვიშიმშილე „ნაცმოძრაობის“ ოფისში და კინაღამ შევწირე ჩემი ჯანმრთელობა თავიდან ბოლომდე. ასეთი ადამიანი, რომელსაც მე ყველაფერში გვერდში ვედექი, ნაცვლად იმისა, რომ მართლა, ჩემგან კრიტიკულ აზრს იტანდეს, კრიტიკული აზრის გამო მზად არის, ფიზიკურად გაგვისწორდეს და გაგვანადგუროს. შესაბამისად, პირდაპირ მივმართავ მას, ამ მეთოდების გამო, მოუწევს „ნაციონალური მოძრაობის“ თავმჯდომარეობიდან წასვლა“, – განაცხადა გიორგი მუმლაძემ.~

 „ნაციონალურმა მოძრაობამ“ პარტიაში მომხდარ დაპირისპირებასთან დაკავშირებით განცხადება დღეს გაავრცელა. როგორც განცხადებაშია აღნიშნული, მოძრაობა „საქართველოსთვის“ აქტივისტი გიორგი მუმლაძე ნიკა მელიას სამუშაო ოთახში შეიჭრა და შეურაცხმყოფელი, ქუჩური ტერმინოლოგიით სცადა პროვოკაციის მოწყობა, რაც პარტიის წევრებმა აღკვეთეს.