აშშ-ის სახელმწიფო მდივანმა ენტონი ბლინკენმა განაცხადა, რომ შეერთებული შტატები წინააღმდეგი არ არის, რომ უკრაინამ გამოიყენოს დასავლეთის შეიარაღება იმ ტერიტორიების დასაბრუნებლად, სადაც რუსეთმა ფსევდორეფერენდუმები გამართა.

ამის შესახებ ბლინკენმა ინდოელ კოლეგასთან ერთად გამართულ პრესკონფერენციაზე განაცხადა. იუწყება უკრაინული მედია.

ბლინკენმა უპასუხა ჟურნალისტების შეკითხვას, მისცემს თუ არა აშშ უკრაინას უფლებას, გამოიყენოს ამერიკული შეიარაღება იმ ტერიტორიებზე, სადაც რუსეთმა ფსევდორეფერენდუმები გამართა, იმისგან დამოუკიდებლად რა შედეგებსაც გამოაცხადებს კრემლი.

 „ჩვენ და სხვა ბევრმა ქვეყანამ უკვე მკაფიოდ განვაცხადეთ: ჩვენ არ ვაღიარებთ, უფრო სწორად, ჩვენ არასდროს ვაღიარებთ რუსეთის მიერ უკრაინის ტერიტორიების ანექსიას... უკრაინას აქვს სრული უფლება თავი დაიცვას მთელ თავის ტერიტორიაზე, კერძოდ, დაიბრუნოს ტერიტორიები, რომლებიც რუსეთმა ამა თუ იმ საშუალებით უკანონიდ დაიკავა“, - განაცხადა ბლინკენმა.

მისი თქმით, შეიარაღება, რომელსაც აშშ და სხვა ქვეყნები უკრაინას აწვდიან, ძალინ ეფექტურად იყო გამოყენებული ტერიტორიების დასაბრუნებლად, კერძოდ, ცოტა ხნის წინ ჩრდილო-აღმოსავლეთსა და სამხრეთში.

ბლინკენმა აღნიშნა, რომ ფსევდორეფერენდუმები რუსეთის მიერ დაპყრობილი უკრაინის ტერიტორიებისთვის არაფერს ცვლიან.

 „უკრაინელები განაგრძობენ იმის გაკეთებას, რაც უნდა გააკეთონ, რათა დაიბრუნონ მიწები, რომლებიც მას წაართვეს.. ჩვენ გავაგრძელებთ მათ მხარდაჭერას“, - აღნიშნა ბლინკენმა.