იტალიის მომავალი პრემიერ-მინისტრი ჯორჯია მელონი უკრაინას მხარდაჭერას დაჰპირდა.

ამის შესახებ მან „ტვიტერში“ დაწერა, მას შემდეგ, რაც უკრაინის პრეზიდენტმა ვოლოდიმირ ზელენსკიმ არჩევნებში განარჯვება მიულოცა.

„ძვირფასო პრეზიდენტო ზელენსკი, თქვენ იცით, რომ შეგიძლიათ ჩვენი ერთგული მხარდაჭერის იმედი გქონდეთ უკრაინელი ხალხის თავისუფლბისთვის ბრძოლაში. იყავით ძლიერი და შეინარჩუნეთ თქვენი ურყევი რწმენა“, - დაწერა მელონმა.

იტალიის საპარლამენტო არჩევნებში, რომელიც 25 სექტემბერს გაიმართა, ორივე პალატაში გამარჯვება მოიპოვა მემარჯვენეთა კოალიციამ.
მელონი იმ მცირერიცხოვან იტალიელ პოლიტიკურ ლიდერებს შორისაა, რომელმაც მარიო დრაგის პრემიერ-მინისტრობის დროს უკრაინისთვის იარაღის მიწოდებას მხარი დაუჭირა, მიუხედავად იმისა, რომ იმ დროისთვის მელონი ოპოზიციის წევრი იყო.

ჯორჯია მელონი იტალიის პირველი ქალი პრემიერ-მინისტრი გახდება და უხელმძღვანელებს მეორე მსოფლიო ომის შემდეგ ყველაზე მემარჯვენე მთავრობას. ხმების მიხედვით, პარლამენტის ორივე პალატაში მემარჯვენე ბლოკი სოლიდურ უმრავლესობას მოიპოვებს, რაც იტალიისთვის საკმაოდ იშვიათია.