ამერიკის ომის შემსწავლელი ინსტიტუტი (ISW) მორიგ ანგარიშში წერს, რომ რუსეთის თავდაცვის სამინისტრო არაფერს ამბობს ლიმანის რაიონში ბოლოდროინდელ დანაკარგებზე და მზად არ არის ფრონტის ამ მონაკვეთის დაცემისთვის, რაც სავარაუდოდ, კიდევ უფრო გააუარესებს ისედაც დაბალ მორალურ სულისკვეთებას.

ინსტიტუტის მონაცემებით, უკრაინის არმია რუსეთის ჯარების პოზიციებს უტევს დონეცკის ოლქის ქალაქ ლიმანიდან 12 კილომეტრში. ცენტრის ექსპერტები ყურადღებას ამახვილებენ რუსი სამხედრო ბლოგერების შეფასებებზე, რომ ლიმანში რუსეთის დაჯგუფებები მალე დამარცხდებიან.

ექსპერტთა თანახმად, რუსეთის შეიარაღებული ძალებისთვის ლიმანის დაკარგვას ექნება სერიოზული შედეგები დონეცკის ოლქის ჩრდილოეთსა და ლუგანსკის ოლქის დასავლეთში, რადგან უკრაინელ სამხედროებს ლიმანზე კონტროლის აღდგენა მისცემს იმის შესაძლებლობას, რომ მოწინააღმდეგის პოზიციებს საფრთხე შეუქმნას ლუგანსკის ოლქის დასავლეთ საზღვართან და სევეროდონეცკის და ლისიჩანსკის რაიონებში.

ომის შემსწავლელი ინსტიტუტის მიერ გამოქვეყნებული რუკის მიხედვით, ლიმანი თითქმის სრულად უკრაინელი სამხედროების ალყაშია.

ექსპერტების აზრით, კრემლმა, შესაძლოა, დროებით გადადოს ოკუპირებული უკრაინის ტერიტორიების ანექსია, რათა უკეთესად მოამზადოს რუსეთის საინფორმაციო სივრცე, თუმცა 30 სექტემბერი დიდი ალბათობით რჩება ანექსიის გამოცხადების თარიღად.

ინსტიტუტის მონაცემებით, რუსეთის ხელისუფლება განაგრძობს ცოტა ხნის წინ გაწვეულებისა და არასაკამარისად მომზადებულ მოხალისეების ფრონტზე გაგზავნას, სავარაუდოდ, სხვადასხვა ქვედანაყოფების დეგრადირებული ნაშთების გასაძლიერებლად, მათ  შორის იმ ქვედანაყოფების, რომლებიც ადრე რუსეთის მთავარ საბრძოლო ძალებად მიიჩნეოდნენ.