სომხეთის პრემიერ-მინისტრი ნიკოლ ფაშინიანი აზერბაიჯანს სომეხი სამხედრო ტყვეების დახვრეტაში ადანაშაულებს და ამბობს, რომ ყველაფერს შეეცდება, რომ დამნაშავეები უმკაცრესად დაისაჯონ.  

„სოციალურ ქსელებში ვრცელდება კიდევ ერთი შემაძრწუნებელი ვიდეო: აზერბაიჯანელი ჯარისკაცები თვითნებურად ხვრეტენ სომეხი სამხედო ტყვეების ჯგუფს სომხეთის სუვერენულ ტერიტორიაზე“, - წერს ფაშინიანი Twitter-ში.

მისი თქმით, საერთაშორისო საზოგადოებამ „მკაცრად უნდა დაგმოს აღნიშნული სამხედრო დანაშაული და მიიღოს შესაბამისი ზომები, რათა შეაჩეროს აზერბაიჯანის აგრესია“.

ევროკავშირის სპეციალურმა წარმომადგენელმა სამხრეთ კავკასიაში ტაივო კლაარმა განაცხადა, რომ თუ დამტიკიცდება ვიდეოს ნამდვილობა, მაშინ ეს სამხედრო დანაშაული იქნება, რომელიც აუცილებლად უნდა იყოს გამოძიებული, დამნაშავეები კი დაისაჯონ.

ფაქტს ეხმიანება აზერბაიჯანის გენერალური პროკურატურა  და აცხადებს, რომ აზერბაიჯანის სამხედრო პროკურატურა სრულყოფილად იძიებს ვიდეოს ავთენტურობას.

„აზერბაიჯანის სამხედრო პროკურატურა სრულად და სრულყოფილად იძიებს ამ კატეგორიის ვიდეოების ავთენტურობას, ასევე დროსა და ადგილს, სადაც ვიდეო გადაიღეს, მათზე გამოსახული სამხედროების ვინაობას, ასევე ყველა სხვა დეტალს, რაც მნიშვნელოვანია ობიექტური ჭეშმარიტების დადგენისთვის. გამოძიების შედეგების მიხედვით, კანონით გათვალისწინებული ზომები იქნება მიღებული“, – აღნიშნულია განცხადებაში.