ამერიკის ელჩზე არც ერთი თავდასხმა არ მახსენდება, ორის გარდა. ორი გამონაკლისი იყო – ერთი ეკუთვნოდა ნიკა გვარამიას და მეორე ნიკანორ მელიას, – ამის შესახებ საპარლამენტო უმრავლესობის ლიდერმა ირაკლი კობახიძემ განაცხადა.

კობახიძეს ჟურნალისტებმა კითხვა დაუსვეს იარაღის კონტროლისა და საერთაშორისო უსაფრთხოების საკითხებში აშშ-ის სახელმწიფო მდივნის მოადგილის ბონი დენის ჯენკინსის განცხადებასთან დაკავშირებით, სადაც ბონი ჯენკინსი აღნიშნავს: „მოუთმენლად ველოდები, გავაჟღერო გზავნილი იმ უმნიშვნელოვანესი სამუშაოს მიმართ, რასაც ელჩი დეგნანი ახორციელებს საქართველოში, მასზე თავდასხმები უაღრესად შემაშფოთებელი იყო“.

როგორც კობახიძე ამბობს, „ქართული ოცნებიდან“ წასულმა დეპუტატებმა ელჩ კელი დეგნანს მხოლოდ კითხვებით მიმართეს, რაც თავდასხმა არ არის.

„ტერმინი თავდასხმა იყო გამოყენებული. ამერიკის ელჩზე არც ერთი თავდასხმა არ მახსენდება, ორის გარდა. ორი გამონაკლისი იყო – ერთი ეკუთვნოდა ნიკა გვარამიას და მეორე ნიკანორ მელიას. ანუ, მათ ჰქონდათ ასეთი განცხადებები, მათ შორის შეურაცხმყოფელი გამონათქვამები, სხვა თავდასხმა არ მახსენდება. არ ვიცი, ვის გულისხმობდა, მას უნდა ჰკითხოთ. თავდასხმა იყო მელია და გვარამია, სხვა – არა. ჩვენ რომ ვფიქრობდეთ, რომ დეპუტატები, „ხალხის ძალის“ წევრები თავს ესხმიან ელჩს, ურთიერთობებს აზიანებენ და ასე შემდეგ, რა თქმა უნდა, გამიჯვნა გვექნებოდა, მაგრამ მათ ყველაფერი დაიწყეს კითხვების დასმით და როცა კითხვებს პასუხი არ გაეცა, ამას მოჰყვა მათი ინტერპრეტაცია.

რა თქმა უნდა, ეს არ არის თავდასხმა. საქართველო იმით ამაყობს, რომ 2012 წლის შემდეგ გამოხატვის თავისუფლება გვაქვს. გამოხატვის თავისუფლება აქტუალურია არა მხოლოდ ქვეყნის შიგნით, არამედ საერთაშორისო ურთიერთობებშიც. ბუნებრივია, გამოხატვის თავისუფლებას ვერავინ ვერავის შეუზღუდავს. აქედან გამომდინარე, თუ ვინმე ეცდება, ამ ადამიანებს გამოხატვის თავისუფლება შეუზღუდოს, რა თქმა უნდა, მათ კონსტიტუცია დაიცავს“, – განაცხადა ირაკლი კობახიძემ.