თუ ვამბობთ, რომ სუსტად არის, არ შევაწუხოთ ეს ადამიანი, - ამის შესახებ "ქართული ოცნების" დეპუტატმა, ირაკლი ზარქუამ კიევის სასამართლოს მიერ მიხეილ სააკაშვილის უკრაინაში დროებით გადაყვანის გადაწყვეტილებასთან დაკავშირებით განაცხადა.

ბოდიში, მიხეილ სააკაშვილი უკრაინას რატომ უნდა გადაეცეს? ვერ გავიგე. თუ ეს აუცილებლობაა, კი ბატონო, შესაბამისი ტექნოლოგიები განვითარებულია, რომ პირდაპირ ჩართონ და დაკითხონ, პრობლემა არ არის. მითუმეტეს, თუ ვამბობთ, რომ სუსტად არის, არ შევაწუხოთ ეს ადამიანი. ის არის კლინიკაში, სადაც მკურნალობს და რეაბილიტაციას გადის. ასე რომ, მე მგონია, რომ არ უნდა შევაწუხოთ [...] ეს თვითონ პატიმრისთვის იქნება ცუდი იმიტომ, რომ ხომ ამტკიცებენ და ამბობენ, სუსტად არისო, ახლა უკრაინაში ტრანსპორტირება, თან იქ ომი და უბედურება ხდება და უსაფრთხოებაზე პასუხისმგებლობას ვინ აიღებს?", - თქვა ზარქუამ.

კიევის ბორისპოლის სასამართლომ მიხეილ სააკაშვილის უკრაინაში დროებით, საგამოძიებო მოქმედებისთვის გადაყვანის გადაწყვეტილება გუშინ, 6 ოქტომბერს მიიღო. სააკაშვილის ადვოკატი, შალვა ხაჭაპურიძე ამბობს, რომ უკრაინის სასამართლო საქართველოდან სააკაშვილის გადაცემას ითხოვს, რათა დაკითხონ დაზარალებულის სახით, 2017 წლის მოვლენებთან დაკავშირებით.