ფრონტის ხაზზე უკრაინის ძალების ბოლო წარმატებებმა, დიდი ბრიტანეთის ხელისუფლებას იმედი გაუჩინა, რომ სრულმასშტაბიანი ომი  წლის ბოლომდე დასრულდება. იუწყება The Times.

ბრიტანელი პოლიტიკოსების ოპტიმიზმი გამოწვეულია სწორედ უკრაინელი სამხედროების ბოლო წარმატებებით და არა კონკრეტული სადაზვერვო მონაცემებით. ბრიტანეთის მთავრობის მაღალჩინოსნებმა გამოცემას უთხრეს, რომ იმ შემთხვევაში, თუ უკრაინის წარმატება გაგრძელდება, რუსეთის ძალები განდევნილი იქნებიან დონბასიდან და რუსეთში წლის ბოლომდე დაბრუნდებიან.

ამავე დროს, ყირიმის დაბრუნება, რომლის ანექსიაც რუსეთმა 2014 წელს მოახდინა, რთული იქნება და როგორც მოსალოდნელია, დიდ სამხედრო დანაკარგს  მოიტანს. The Times-ს ასევე უთხრეს, რომ ვერ ხედავან ნიშნებს იმისა, რომ ზამთარში საბრძოლო მოქმედებები შეწყდება.

ევროპის რეგიონში აშშ-ის სამხედრო ძალების ყოფილი მთავარსარდალი ბენ ჰოჯესი იზიარებს ბრიტანეთის მთავრობის არაოფიციალურ მოსაზრებას.

„ყველაფრიდან გამომდინარე, რასაც ჩვენ ვხედავთ, იქმნება შთაბეჭდილება, რომ ეს არის კოლაფსი {რუსული ძალების}, ყოველ შემთხვევაში დონბასში და მჯერა, რომ რუსები 23 თებერვლის ხაზს იქით წლის ბოლომდე განიდევნებიან“, - განაცხადა ჰოჯესმა.

რაც შეხება ყირიმს, ჰოჯესმა აღნიშნა, რომ საბრძოლო მოქმედებები 2023 წლის ზაფხულამდე გაგრძელდება ნახევარკუნძელზე რუსეთის ძალების დიდი რაოდენობის გამო. ამასთან, ხერსონის დაბრუნება უკრაინას შესაძლებლობას მისცემს გაანადგუროს ყირიმში სამხედრო სამიზნეები ზალპური ცეცხლის რეაქტიული სისტემებიდან.

ამასთან, ზოგიერთი სამხედრო ანალიტიკოსი სიფრთხილეს იჩენს და  ამბობს, რომ უკრაინელების წარმატება ასეთი ერთმნიშვნელოვანი არ არის და ინციატივის დაკარგვის მიუხედავად, რუსეთი ჯერ კიდევ ინარჩუნებს მნიშვნელოვან ძალებს უკრაინის ოკუპირებულ ტერიტორიებზე, კერძოდ, დონბასში.