უკრაინის პრეზიდენტი ვოლოდიმირ ზელენსკი 10 ოქტომბერს, დილით უკრაინაზე რუსეთის მასირებულ იერიშს ეხმიანება.

 „სრულმასშტაბიანი ომის 229-ე დღე. 229-ე დღეა ცდილობენ გაგვანადგურონ და მიწასთან გაგვასწორონ, გაანადგურონ ჩვენი ხალხი, რომლებსაც სძინავთ ზაპოროჟიეში, დახოცონ ადამიანები, რომლებიც მიდიან სამსახურში დნიპროსა და კიევში“, - წერს ზელენსკი.

ის ამბობს, რომ საჰაერო განგაშის ხმა მთელი უკრაინის ტერიტორიაზე ისმის.

„არის სარაკეტო დარტყმები. სამწუხაროდ, არიან დაღუპულები და დაჭრილები. ძალიან გთხოვთ: არ გამოხვიდეთ თავშესაფრებიდან. გაუფრთხილდით თქვენს თავს და ახლობლებს. მედგრად დავდგთ და ვიყოთ ძლიერები“, - ამბობს უკრაინის პრზეიდენტი.

გავრცელებული ინფორმაციით, დღეს, 10 ოქტომბერს, აფეთქებების ხმა გაისმა ერთდროულად რამდენიმე ოლქში -ვინიცის, ლვოვის, კიროვოგრადის, მიკოლაივის, პოლტავის, ტერნოპოლის, ჟიტომირის, კიევისა და სხვა რეგიონებში. ოკუპანტები ახორციელებენ მასირებულ დარტყმებს მთელი უკრაინის ტერიტორიაზე.