რუსეთის ფედერალური უსაფრთხოების სამსახური (ეფ-ეს-ბე) ამტკიცებს, რომ დაადგინეს ყირიმის ხიდის აფეთქების ორგანიზატორების ვინაობა. მათი თქმით,  აფეთქების ორგანიზატორი უკრაინის სადაზრვერვო სამსახურის ხელმძღვანელი კირილ ბუდანოვი და მისი თანამშრომლები და აგენტები იყვნენ. ინფორმაციას "რია ნოვოსტი" ავრცელებს.

რუსული მხარის მტკიცებით, პროცესებში მონაწილეობდა საქართველოს ორი მოქალაქეც. მათი ინფორმაციით, დააკავეს 8 პირი, აქედან რუსეთის 5 მოქალაქე და 3 უკრაინისა და სომხეთის მოქალაქეები.

უწყების ვერსიით, ფეთქებადი მოწყობილობა დამალული იყო სამშენებლო მასალებში. რუსეთის მტკიცებით, აგვისტოს დასაწყისში ტვირთი თავდაპირველად უკრაინიდან, ოდესის პორტიდან ბულგარეთში, ქალაქ რუსეში გაგზავნეს, აქედან საქართველოში, ფოთის პორტში, ამის შემდეგ კი სომხეთში. რუსეთის ვერსიის მიხედვით, ტვირთი სომხეთიდან კვლავ საქართველოში დააბრუნეს, საიდანაც რუსეთში გადაიტანეს.

ეფ-ეს-ბე-ს მტკიცებით, გადაზიდვების პროცესში, უკრაინისა და სომხეთის მოქალაქეებთან ერთად, მონაწილეობდა საქართველოს ორი მოქალაქე, სანდრო ინოსარიძე და ბროკერი, სახელად ლევანი.

უწყებაში ამბობენ, რომ 4 ოქტომბერს საქართველოში დარეგისტრირებულმა სატვირთო მანქანამ ასაფეთქებელი მასალით დატვირთული ბარგი ზემო ლარსის გამშვები პუნქტის გავლით გადაიტანა.

8 ოქტომბერს, გამთენიისას ანექსირებული ყირიმის რუსეთთან დამაკავშირებელ ერთადერთ ხიდზე აფეთქება მოხდა.

გავრცელებული ინფორმაციით, ცეცხლი სატვირთო მატარებელს გაუჩნდა, ნაწილობრივ ჩამოინგრა საავტომობილო გზაც.

პუტინმა მომხდარზე სამთავრობო კომისიის შექმნის ბრძანება გასცა. რუსული მხარის ინფორმაციით, აფეთქებას 4 ადამიანი ემსხვერპლა.