"ქართული ოცნების" დეპუტატი, გიორგი ამილახვარი ბოდიშის იხდის რამდენიმე საათის წინ ვაკის პარკში მომხდარ უბედურ შემთხვევასთან დაკავშირებით გაკეთებული კომენტარის გამო. ის ამბობს, რომ განცხადების გაკეთების დროს არ იყო სრულად ინფორმირებული მომხდარის შესახებ.

"მინდა მივუსამძიმრო საზოგადოებას და განსაკუთრებით ოჯახს ამ მცირეწლოვანი ბავშვის ასე ტრაგიკულად გარდაცვალება. ყველა, ჩვენ მოზიარე ვართ ამ საშინელი ამბის. ბოდიში მინდა მოვიხადო და მოვუხადო პირველ რიგში გარდაცვლილის სულს, მის ოჯახს და მთლიანად საზოგადოებას. არ აქვს იმის ახსნას აზრი, თუ რა კონტექსტით გავაკეთე ის განცხადება, რაც გავაკეთე. ეს ჩემთვის არის ცხოვრებისეული კრედო, მსგავსი არასდროს არ მიფიქრია მთელი ცხოვრების განმავლობაში და ჩემთვისაც ამ კონტექსტში ის გაცხადება, რაც გავაკეთე არის სრულიად მიუღებელი.

ახლა არ მგონია ოჯახს იქეთ ვინმე ისე განიცდიდეს ამ ამბავს, ვიდრე მე, ვინაიდან სრულიად გაუცნობიერებლად, სრულიად სხვა კონტექსტში და ასე იყო კითხვა დასმული, იქნა ჩემ მიერ გაცემული პასუხი...", - თქვა გიორგი ამილახვარმა.

მანამდე, ამილახვარმ განაცხადა, რომ არასრუწლოვანს მეთვალყურე უნდა ჰყავდეს.

"ვაკის პარკში მიმდინარეობს რეკონსტრუქცია. ბავშვები თამაშობენ. ჩაუვარდა ბურთი. ალბათ, არასრულწლოვანი იყო ეს ბავშვი. არასრულწლოვან ბავშვს რომ უნდა ჰყავდეს მეთვალყურე, რომ არ მოხდეს იმ ადგილას მისი ჩასვლა, სადაც მიმდინარეობს რეკონსტრუქცია და ბუნებრივია, მსგავსი რაღაცა ტექნიკური შეფერხებები შეიძლება იყოს და გამოიწვიოს ადამიანის ჯანმრთელობის დაზიანება გამოიწვიოს - არა მარტო ბავშვის, არამედ ნებისმიერი მოზარდის… ამაზე ახლა რამე პასუხისმგებლობას სთხოვ ვის? და ამას მეკითხები სერიოზულად? [უსაფრთხოების ზომები] ცხადია, უნდა იყოს", - ამბობდა დეპუტატი მაშინ, როცა ჯერ კიდევ არ იყო ამ უბედურ შემთხვევასთან დაკავშირებით ყველა დეტალი ცნობილი.

დღეს ვაკის პარკის შადრევანში ბურთის ამოსაღებად ჩასულ 3 ბავშვს დენმა დაარტყა. ერთ-ერთი მოზარდი გარდაიცვალა.