უკრაინის საგარეო საქმეთა მინისტრი დმიტრო კულება პრეზიდენტ ვოლოდიმირ ზელენსკის ირანთან დიპლომატიური ურთიერთობის შეწყვეტის შესახებ ინიციატივას წარუდგენს.

უკრაინული მედიის ცნობით, ამის შესახებ კულებამ ბრიფინგზე განაცხადა.

„ირანის ქმედებები - ეს არის სისასტიკე და სიცრუე, რომელსაც ჩვენ ვერ მოვითმენთ“, - განაცხადა კულებამ და აღნიშნა, რომ თეირანს ეკისრება სრული პასუხისმგებლობა უკრაინასთან ურთიერთობების დაზიანებისთვის.

„ირანული დრონების მიერ უკრაინის სამოქალაქო ინფრასტრუქტურის განადგურების, ჩვენი ხალხისთვის მიყენებული ტანჯვისა და ინფორმაციების გავრცელების ფონზე, რომ ირანმა, შესაძლოა, გააგრძელოს რუსეთისთვის იარაღის მიწოდება, პრეზიდენტთან განსახილველად შემაქვს წინადადება ირანთან დიპლომატიური ურთიერთობების შეწყვეტის შესახებ“, - განაცხადა კულებამ.

ამასთან, კულებამ აღნიშნა, რომ უკრაინას არასდროს დაუკავებია ანტიირანული პოზიცია.

„მაგრამ მას შემდეგ, რაც ირანი გახდა რუსეთის აგრესიისა და დანაშაულების თანამონაწილე, ჩვენ დღეს დავიკავებთ ძალიან მკაფიო  და სამართლიან პოზიციას. შეწყვეტს ირანი რუსეთისთვის იარაღის მიწოდებას - ჩვენ დავიწყებთ საუბარს ურთიერთობების აღდგენის შესახებ“, - განაცხადა კულებამ.