რუსეთის მიერ ანექსირებული ხერსონის ოლქის „ადმინისტრაციამ“ ხერსონის მაცხოვრებლებს მოკლე ტექსტური შეტყობინებები გაუგზავნა, სადაც უკრაინის არმიის შესაძლო დაბომბვის გამო მოქალაქეებს ქალაქის დატოვებისკენ მოუწოდა.

ანექსირებული რეგიონის „ადმინისტრაციის ხელმძღვანელის მოადგილემ“ კირილ სტრემოუსოვმა“ „რია ნოვოსტის“ უთხრა, რომ უკრაინამ ხერსონის ოლქში ფრონტის ხაზზე დიდი რაოდენობით სამხედრო ძალა განათავსა.

მისი თქმით, უკრაინელი სამხედროები შეტევას უახლოეს დღეებში დაიწყებენ, რის გამოც ხერსონი და ოლქის მარჯვენა ნაპირის ნაწილი, შესაძლოა, ცეცხლის ქვეშ მოექცეს. „ქალაქის ჩაბარებას არ ვაპირებთ. ბოლომდე ვიდგებით“, - თქვა სტრემოუსოვმა.

ამასთან, რუსეთის მიერ დანიშნულმა  ხერსონის ოლქის „ხელმძღვანელმა“ ვლადიმირ სალდომ სამშაბათს საღამოს განაცხადა, რომ მდინარე დნიპროს მარჯვენა ნაპირის რაიონებიდან მასობრივად გაიყვანენ სამოქალაქო მოსახლეობას. მისი სიტყვებით, ეს აუცილებელია საომარი მოქმედებების მოსალოდნელი გამწვავების გამო.

ასევე, უკრაინაში რუსეთის ჯარების სარდალმა, გენერალმა სერგეი სუროვიკინმა ხერსონის მიმართულებაზე სიტუაციას დაძაბული უწოდა და განაცხადა, რომ რთული გადაწყვეტილებების მიღებას არ გამორიცხავს.

მასთან ინტერვიუ რუსულ ტელერახ „როსია 24“-ის ეთერში გავიდა. მან პირველად აღიარა რთული ვითარება, რომელშიც რუსეთის არმია ხერსონთან აღმოჩნდა, რაზეც უკვე რამდენიმე კვირაა უკრაინის ხელისულება და უცხოელი ექსპერტები საუბრობენ.

სუროვკინის თქმით, „ნატო კიევისგან მოითხოვს შეტევით ოპერაციებს“ ხერსონის მიმართულებაზე, „ყოველგვარი მსხვერპლის მიუხედავად, როგორც უკრაინის შეიარაღებულ ძალებში, ისე მშვიდობიან მოსახლეობაში“.

სუროვკინის განცხადებით, ხერსონთან მიმართებით რუსეთის შემდგომი გეგმები დამოკიდებული იქნება სამხედრო-ტაქტიკურ სიტუაციაზე. ამასთან მან აღნიშნა, რომ არ გამორიცხავს „არამარტივი გადაწყვეტილებების მიღებას.“

დამოუკიდებელი ექსპერტები არაერთხელ აღნიშნავდნენ, რომ მას შემდეგ, რაც უკრაინის ძალებმა ამერიკული ზალპური ცეცხლის რაექტიული სისტემების HIMARS-ების დახმარებით, მწყობრიდან გამოიყვანეს მდინარე დნიპროზე რამდენიმე ხიდი, რუსული დაჯგუფებები მდინარის დასავლეთ სანაპიროზე ნორმალური მომარაგების გარეშე დარჩნენ, რამაც ეჭვი გააჩინა, რომ რუსული დანაყოფები ხერსონის შენარჩუნებას ვერ შეძლებენ.